დღევანდელ ხელისუფლებასა და სეპარატისტებს შორის მხოლოდ ის განსხვავება, რომ ისინი ხალხს ხვრეტდნენ, ესენი კი აკავებენ.
ამის შესახებ პარლამენტის ვიცე-სპიკერმა, "ჩვენ თვითონის" ლიდერმა პაატა დავითაიამ დღეს, პარლამენტში გამართულ სპეციალურ ბრიფინგზე, განაცხადა.
"როგორც ხედავთ, საქართველოს ხელისუფლება დევნილების მიმართ აგრძელებს სადამსჯელო ღონისძიებებს. ის, რაც დღეს ხდება, აღმაშფოთებელია და როდესაც ვუყურებდი დევნილების გამოსახლებას, სოხუმი გამახსენდა; როდესაც სერპარატისტები სახლებს დიდ მანქანებს აყენებდნენ და იქედან ქართველების ქონების ჩატვირთვა და გატანა, ალყის შემორტყმა და ხალხის ადგილზე დახვრეტა ხდებოდა. აქ განსხვავება ერთია - ისინი ადამიანებს ადგილზე დახვრეტდნენ, ხოლო დღეს ესენი აკავებენ", - აღნიშნა დავითაიამ.
დავითაიამ ხელისუფლებას ურჩია, რომ ბოლომდე დაემსგავსოს სეპარატისტებს და დევნილების გამოსახლების სპეცოპერაციები დილის 07:00 საათის ნაცვლად, 05:00 საათზე დაიწყოს, რაც სეპარატისტები სადამსჯელო ღონისძიებების ჩატარების დროს დაემთხვევა.
"ხელისუფლების ქმედებები არღვევს საერთაშორისო ნორმებს, რომლითაც დაცულია დევნილების უფლებები. ეს გათვალისწინებულია, როგორც საქართველოს მთავრობის სტრატეგაში, ასევე საერთაშორისო რეზოლუციებში. ის, რაც დღეს ხდება, ამის შემდეგ, რომელ აფხაზეთის და ცხივალის რეგიონის დაბრუნებაზეა საუბარი, როგორ უნდა მოვხიბლოთ აფხაზები და ოსები ჩვენთან თანაცხოვრებით", - განაცხადა პარლამენტის ვიცე-სპიკერმა.
ამასთან, დავითაიამ საქართველოს ხელისუფლებას მოსთხოვა, სასწრაფოდ მოხდეს დევნილების გამოსახლების პროცესის შეჩერება და ყველა დაკავებული პირი განთავისუფლდეს.
"ის პროცესები, რაც დღეს საქართველოში ვითარდება, ქვეყნის იმიჯს დიდ ზიანს მიაყენებს", - აცხადებს დეპუტატი.