დევნილების ძალით გამოსახლების შემდეგ ისინი დევნილობის ორმაგ რეჟიმში აღმოჩდნენ.
ამის შესახებ სამოქალაქო მოძრაობა "სოლიდარობა უკანონო პატიმრების" ლიდერმა ეკა ბესელიამ ბაგების ყოფილი სტუდქალაქიდან დევნილების გამოსახლების კომენტირებისას აღნიშნა.
"დევნილების იძულებით გადასახლება, მათ დევნილობის უკვე ორმაგ რეჟიმში აყენებს. ხელისუფლების მიერ პოლიციელთა ძალის გამოყენებით დევნილთა იძულებით გამოსახლება არის უკანონობა და სასტიკი დამოკიდებულება. პოლიციამ უკანონოდ დააკავა რამდენიმე ადამიანი და ფიზიკური შეურაცხყოფა მიაყენეს მათ. მოვითხოვთ, შეწყდეს დევნილთა გამოსახლების პროცესი და გათავისუფლდეს ყველა უკანონოდ დაკავებული პირი", - აღნიშნა ბესელიამ.
ამასთან, ოპოზიციის წარმომადგენლების ინფორმაციით, დევნილების გამოსახლების დროს დაკავებული პირები საბურთალოს პოლიციის განყოფილებაში არიან გადაყვანილები.
შეგახსენებთ, რომ დღეს ბაგებში დევნილების გამოსახლების დროს პოლიციასთან შეხლა-შემოხლა მოხდა, რის შემდეგაც "კონსერვატორების" ერთ-ერთი წევრი გია ყრუაშვილი, ასევე "დევნილთა სამოქალაქო მოძრაობის" ლიდერი მანუჩარ სიგუა და ოთხი დევნილი ქალი დააკავეს.