პოლონეთი მივიდა იმ დასკვნამდე, რომ ლეხ კაჩინკის თვითმფრინავის კატასტროფის მიზეზი რუსი დისპეჩერების მიერ ეკიპაჟისათვის მიცემული ბრძანებები გახდა. პოლონეთის კომისიამ სმოლენსკთან მომხდარი კატასტროფის მიზეზების თავისი ვერსია გამოაქვეყნა. პრესკონფერენციის ონლაინ ტრანსლაცია პოლონურ არხს "TVN24"-ს მიჰყავდა.
პოლონელი ექსპერტები მივიდნენ დასკვნამდე, რომ ეკიპაჟის წევრებმა შეცდომები რუსი დისპეჩერების ბრძანებების გამო დაუშვეს. პოლონელი ექსპერტების დასკვნის მიხედვით რუსმა დისპეჩერებმა ძალიან გვიან მისცეს ბრძანება "ჰორიზონტი", რომელიც მაშინ უნდა მიცემულიყო, როდესაც თვითმფრინავი 100 მეტრის სიმაღლეზე იმყოფებოდა. მაგრამ როდესაც რუსმა დისპეჩერებმა ეს ბრძანება გასცეს თვითმფრინავი საჭიროზე ორჯერ უფრო ნაკლებ სიმაღლეზე იმყოფებოდა.
ამას გარდა, პოლონელი ექსპერტები ასევე ამტკიცებენ, რომ დაფრენის ზონის დისპეჩერებმა დროულად არ მიაწოდეს ტუ-154-ის ეკიპაჟს მიცემული კურსიდან გადაცდომის შესახებ. ექსპერტები ასევე ვარაუდობენ, რომ ექსპერტების კოშკში შესაძლოა გარეშე პირები იმყოფებოდნენ.
ამას გარდა, პრესკონფერენციაზე ასევე წარმოადგინეს ტუ-154-სა და ილ-76 -ის ფრენის ვიდეორეკონსტრუქცია და ილ-76-ის დაჯდომა, რომელიც ანალოგიურ ბუნებრივ პირობებში იმავე დილით სათადარიგო აეროდრომზე დაფრინდა.
პოლონური მხარე აღნიშნავს, რომ არ აკეთებს დასკვნებს იმასთან დაკავშირებით, თუ ვინ უნდა აგოს ყოველივე ამაზე პასუხი, ვინაიდან გამოძიების მიზეზი არა დამნაშავეთა ძებნა, არამედ მომავალში ასეთი კატასტროფების თავიდან აცილებაა.
აღსანიშნავია, რომ პოლონეთის გარდაცვლილი პრეზიდენტის ლეხ კაჩინკის ოჯახმა ჯერ კიდევ გუშინ განაცხადა, რომ ტრაგედია, რომელიც სმოლენსკთან მოხდა მოსკოვის მიერ იყო მოწყობილი. ოჯახი აცხადებს, რომ მიზეზთა შორის, რომელთა გამოც, მოსკოვს კაჩინსკის სიკვდილი უნდოდა არის მისი შესაძლო გამარჯვება მომავალ საპრეზიდენტო არჩევნებზე, მისი რეაქცია 2008 წლის 8 აგვისტოში საქართველოში მომხდარ ომზე და ასევე პოლონეთის პოზიცია ევროკავშირში.
შეგახსენებთ, რომ პოლონური მხარე საერთაშორისო საავიაციო კომიტეტის საბოლოო ანგარიშით უკმაყოფილო დარჩა. საერთაშორისო საავიაციო კომიტეტის ანგარიშის მიხედვით, რომელიც პოლონეთის პრეზიდენტის თვითმფრინავის ავიაკატასტროფის მიზეზების დადგენას ეხებოდა - ავიაკატასტროფის მიზეზი ეკიპაჟის მოქმედება იყო.
საერთაშორისო საავიაციო კომიტეტის ექსპერტებმა ავიაკატასტროფის მიზეზებს ასევე განაკუთვნეს ფსიქოლოგიური ზეწოლა, რომელსაც მაღალჩინოსანი მგზავრები ეკიპაჟის წევრებზე ახორციელებდნენ. პოლონეთის სამხედრო საჰაერო ძალების მთავარსარდლის სისხლში, რომელიც პილოტის კაბინაში იმყოფებოდა აღმოჩენილია 0,6 პრომილი ალკოჰოლი. ეკიპაჟის მეთაური საერთაშორისო საავიაციო კომიტეტის ექსპერტების აზრით, გაუმართლებელ რისკზე წავიდა. მას სურდა დაშვება განეხორციელებინა რადაც არ უნდა დაჯდომოდა ეს.
საერთაშორისო საავიაციო კომიტეტის ტექნიკურმა კომისიამ კატასტროფამდე მიმყვან ფაქტებად არ მიიჩნია აეროდრომის მდგომარეობა და სახმელეთო სამსახურების თანამშრომელთა მომზადება.
საერთაშორისო საავიაციო კომიტეტმა 12 იანვარს პოლონელ დიპლომატებს გაუგზავნა გამოძიების შედეგად მომზადებული დასკვნების საბოლოო ვერსია. ეს ანგარიში ვარშავამ ჯერ კიდევ 2010 წლის ოქტომბერში მიიღო და მას პოლონეთის პრემიერ-მინისტრმა დონალდ ტუსკმა მიუღებელი უწოდა. დეკემბერში ცნობილი გახდა, რომ პოლონეთმა რუსეთს შესწორებები გაუგზავნა, რომლებიც 150 გვერდზე იყო განთავსებული.
ავიაკატასტროფა სმოლენსკთან რომელშიც პოლონეთის პრეზიდენტი ლეხ კაჩინსკი, მისი მეუღლე და მთავრობის წევრები დაიღუპნენ 2010 წლის 10 აპრილს მოხდა.
