კოალიცია ,,ძლიერი საქართველოს” ერთ-ერთი ლიდერის, ქეთევან თურაზაშვილის თქმით, სკოლების შენებლობა/რეაბილიტაციის წლობით გაწელილი პროცესი განათლების ხარისხს საგრძნობლად აზიანებს, სამინისტრო კი ამ პრობლემას არ იმჩნევს.
,,ძალიან ვრცელია ჩამონათვალი იმ სკოლებისა, რომელიც დაანგრიეს ან რემონტი დაიწყეს და ეს პროცესი არასოდეს დასრულდა. მახსენდება მეჯვრისხევის სკოლა, რომლის მოსწავლეებსაც 21-13 კილომეტრის გავლა უწევთ სკოლაში მისასვლელად და ისინი მესამე ცვლაში სწავლობენ, გვიან ღამით ბრუნდებიან სახლში და ცხადია ვერაფერს ასწრებენ. მახსენდება 179 სკოლა ვარკეთილში, უამრავი სკოლა ნაძალადევში, ზოგადად 250 სკოლაა ამ მდგომარეობაში და აპირებენ კიდევ 800 სკოლა დაინგრეს ან რემონტი დაიწყოს, ოღონდ არ გვიკონკრეტებენ იმ ვადებს, როდის დასრულდება და როდის დაბრუნდებიან მოსწავლეები და მასწავლებლები საკუთარ სკოლებში. არავინ ფიქრობს იმ მშობლებზე, რომლებმაც თავის დროზე სწორედ იმიტომ აარჩიეს ეს სკოლები, რომ ბავშვებს ბევრი დრო არ დასჭირვებოდათ გზაში და უსაფრთხოდ ევლოთ სკოლაში, სახლთან ახლოს.
ეს ყველაფერი უნდა დამთავრდეს და შეიცვალოს, რადგან ხარისხიანი განათლების მიღება არის საფუძველი ჩვენი შვილების უზრუნველი მომავლისა. შესაბამისად, აუცილებელია საქართველოში ეს ვითარება შეიცვალოს და ამ მოცემულობის შეცვლა ჩვენ შეგვიძლია 26 ოქტომბერს არჩევნებზე მისვლით და სწორი არჩევანის გაკეთებით. ძლიერი საქართველო არის რეალური ალტერნატივა, რომ შეიცვალოს დღევანდელი ხელისუფლება, რეალური ალტერნატივა, რომ ჩვენმა ქვეყანამ გააგრძელოს განვითარება” - განაცხადა ქეთევან თურაზაშვილმა.
