2024 წლის 26 ოქტომბრის საპარლამენტო არჩევნებში „ქართული ოცნების“ დამაჯერებელი გამარჯვების შემდეგ ერთხელ და სამუდამოდ უნდა დასრულდეს რადიკალების მონაწილეობა ქართულ პოლიტიკაში. და არათუ უნდა დასრულდეს, დღის წესრიგში უნდა დადგეს რეჟიმის გასამართლების საკითხი ყველაზე მძიმე დანაშაულისთვის, რაც მათ 2008 წლის აგვისტოში ჩაიდინეს და რამაც ჩვენი თანამოქალაქეების სიცოცხლე შეიწირა და საქართველოს ორი ისტორიული რეგიონი დაგვაკარგვინა, – განაცხადა „ქართული ოცნების“ საპატიო თავმჯდომარემ, ბიძინა ივანიშვილმა ოზურგეთში, პარტიის საარჩევნო კამპანიის ღონისძიებაზე სიტყვით გამოსვლისას.
ბიძინა ივანიშვილმა მოსახლეობას პირობა მისცა, რომ არჩევნებში გამარჯვების შემდეგ მმართველი გუნდი კოლექტიურ „ნაცმოძრაობას“ მოღალატეობრივი ქმედებების გამო გაასამართლებს. როგორც ივანიშვილმა აღნიშნა, მომავალ თაობას სჭირდება ჯანსაღი პოლიტიკური სივრცე, სადაც არჩევანი კარგსა და უკეთესს შორის გაკეთდება და არა – ომსა და მშვიდობას შორის.
„პირობას გაძლევთ, რომ არჩევნების შემდეგ ჩვენ აუცილებლად გავასამართლებთ კოლექტიურ „ნაცმოძრაობას“ მოღალატეობრივი ქმედებების გამო, სხვაგვარად შეუძლებელია. უფლისა და სამშობლოს წინაშე ვალდებულნი ვართ, რომ ჩვენს შვილებს, ჩვენს მომავალ თაობას ჯანსაღი, დემოკრატიული პოლიტიკური სივრცე დავუტოვოთ, რათა საზოგადოებას არ უწევდეს არჩევანი ომსა და მშვიდობას, უცხო ქვეყნის აგენტებსა და ქართველი ხალხის ინტერესების გამტარებელ პოლიტიკურ გუნდს შორის და არჩევანს კარგსა და უკეთესს შორის აკეთებდეს. ამიტომაც 26 ოქტომბრის საპარლამენტო არჩევნების შედეგებს, ისევე როგორც 2012 წლის 1 ოქტომბერს, ფუნდამენტური მნიშვნელობა აქვს“, – განაცხადა ბიძინა ივანიშვილმა.
