სუბიექტების მრავალრიცხოვნება არც გვაქვს, არის „ნაცმოძრაობა“, რომელშიც შედის დამატებით რამდენიმე პარტია, ერთად გამოდიან ამ არჩევნებში. ყველა ამ პოლიტიკოსს, ლიდერს, აქვს წარსული და აწმყო პირდაპირ დაკავშირებული „ნაცმოძრაობასთან“, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.
მისი თქმით, „ნაცმოძრაობის“ რეჟიმთან ერთად „ლელოს“ ლიდერები ბიზნესის რეკეტში იყვნენ ჩართული, რაზეც სამართალი უნდა აღსრულდეს.
„რეალურად, სუბიექტების მრავალრიცხოვნება არც გვაქვს. არის თვითონ „ნაცმოძრაობა“, რომელშიც შედის დამატებით რამდენიმე პარტია, ერთად გამოდიან ამ არჩევნებში, ასევე თქვენ იცით, რომ კოლექტიურ „ნაცმოძრაობას“ განეკუთვნება ახალი „გირჩი/დროა“. ყველა ამ პოლიტიკოსს, ლიდერს, აქვს წარსული პირდაპირ დაკავშირებული „ნაცმოძრაობასთან“ და ყველა პოლიტიკოსს აქვს თავისი აწმყო დაკავშირებული „ნაცმოძრაობასთან“. ასევე, არის ასეთი გაერთიანება „ლელო“, რომელიც პირდაპირ იყო ჩართული ბიზნესის რეკეტში და ესეც უნდა იყოს გამოძიების ერთ-ერთი საგანი. პირდაპირ „ნაცმოძრაობის“ რეჟიმთან ერთად, ამ პოლიტიკური ძალის ლიდერები იყვნენ ჩართული ბიზნესის რეკეტში, რაზეც ასეწვე უნდა აღსრულდეს სამართალი. თქვენ იცით, კონსტანტას საქმესთან დაკავშირებით ბრალდებები, მაგნატის საქმესთან დაკავშირებით ბრალდებები, ელიტ-ელექტრონიქსთან დაკავშირებული ბრალდებები და ასე შემდეგ. პირდაპირ ღამე ხდებოდა ბიზნესების გადაფორმება და სესხის ხელოვნურად აღება ბანკების მეშვეობით. ეს გახარია, რომელსაც აქვს შექმნილი კოალიცია „ნაცმოძრაობასთან“ ოთხ მუნიციპალიტეტში, პირდაპირ ალიანსშია კრიმინალურ პოლიტიკურ ძალასთან. ეს არის ერთი კოლექტიური კრიმინალური პოლიტიკური ძალა, რომელიც აუცილებლად უნდა გასამართლდეს, დანარჩენზე გადაწყვეტილებას მიიღებენ შესაბამისი ინსტანციები“, – განაცხადა ირაკლი კობახიძემ.
