საქართველოს ისრაელის პარლამენტის საქართველოსთან მეგობრობის ჯგუფის ხელმძღვანელის და ქნესეთში ეკონომიკის კომიტეტის თავმჯდომარის ხელმძღვანელობით დელეგაცია ეწვევა.
სტუმრების მასპინძელია „ისრაელის სახლი“ და საქართველო-ისრაელის ბიზნესპალატა. 35 წლის იუბილესთვის, საქართველო, ისრაელისა და მსოფლიო ებრაელობის ურთიერთობების ფარგლებში, „ისრაელის სახლი“ იწყებს მზადებას სხვადასხვა ღონისძიებისთვის. მათ შორის, საქართველო-ისრაელის ბიზნესპალატასთან ერთად, დაგეგმილია გლობალური ბიზნესფორუმი, რომელიც, კოვიდპანდემიისა და ისრაელში საომარი მოქმედებების შემდეგ, ბიძგს მიცემს ბილატერალურ ბიზნესს.
ვიზიტისას ისრაელის დელეგაცია ქართულ მხარეს მადლობას გადაუხდის ისრაელის მხარდაჭერის, სოლიდარობისა და ორმხრივი კავშირების გაღრმავებაში შეტანილი წვლილისათვის. დელეგაცია გამართავს, აგრეთვე, შეხვედრას სოფლის მეურნეობის სამინისტროში, ამ სფეროში რეალური თანამშრომლობის საკითხზე.
„ისრაელის სახლის“ ხელმძღვანელმა იციკ მოშემ დელეგაციის ვიზიტამდე წერილით მიმართა საქართველოს პრემიერ-მინისტრს, ირაკლი კობახიძეს, რათა სათავეში ჩაუდგეს ამ მნიშვნელოვან ბიზნესფორუმს, რომლის ფარგლებშიც უნდა მოხდეს საკითხების პროგრესირება და ახალი სიცოცხლე მიეცეს ეკონომიკურ ურთიერთობებს. ბიზნესფორუმისთვის მზადებისთვის დელეგაცია, საქართველოს პარლამენტში ისრაელთან მეგობრობის ჯგუფთან ერთად, გამართავს სამუშაო შეხვედრას, საქართველო-ისრაელის ბიზნესპალატასთან ერთად.
ისრაელის დელეგაციაში შედიან, აგრეთვე, მმართველი პარტიის გენერალური დირექტორი ცური სისო, პარლამენტარი, ეკონომიკის და სოფლის მეურნეობის კომიტეტის წევრი სასონ გუეტა, რომელიც ისაუბრებს ორ ქვეყანას შორის სოფლის მეურნეობის სფეროში თანამშრომლობის გააქტიურების საკითხზე და იმ პოტენციალზე, რომელიც ისრაელში ომის შემდეგ გამოჩნდა.
როგორც იციკ მოშე აღნიშნავს, წელს „ისრაელის სახლის“ მიერ დაგეგმილი ღონისძიებები საქართველო, ისრაელისა და მსოფლიო ებრაელობის 35-წლიანი ურთიერთობების ფარგლებში ჩატარდება და ეს იქნება არა მარტო განვლილი გზის შეჯამება, არამედ ახალი პერსპექტივების შეფასება და თანამშრომლობის პოტენციალზე მხარეებისთვის ექსპერტული ინფორმაციის მიწოდება.
საქართველო, ისრაელისა და მსოფლიო ებრაელობის ურთიერთობის კონტექსტში მნიშვნელოვანია ის, რომ საქართველო საბჭოთა კავშირში პირველი ქვეყანა იყო, სადაც შევიდნენ მსოფლიო ებრაელობის ორგანიზაციები, მათ შორის WUJS (ებრაელ სტუდენტთა მსოფლიო კავშირი) და JAFI, სოხნუთი- მსოფლიო ებრაული სააგენტო. ორივე ავტორიტეტულ ორგანიზაციას საბჭოთა კავშირში იციკ მოშე წარმოადგენდა. სწორედ მისი ორგანიზებით 35 წლის წინ, საბჭოთა რეჟიმის პირობებში, თბილისს ეწვივნენ მსოფლიო ებრაელობის ლიდერები და დაიწყო პირველი ორმხრივი კავშირების დამყარება. ეს, ფაქტობრივად, იყო პირველი კავშირები საბჭოთა რესპუბლიკებთან.
„ისრაელის სახლის“ ხელმძღვანელს იციკ მოშეს მიაჩნია, 35-წლიანმა ურთიერთობებმა მხარეებს ნათლად დაანახა, რომ კავშირების რეალური განხორციელებისთვის აუცილებელია თანამშრომლობის სწორი ფორმატისა და მხარეების პრიორიტეტების ჩამოყალიბება. ამ კონტექსტში, იციკ მოშეს თქმით, მნიშვნელოვანია აღინიშნოს, რომ ებრაელების ისრაელში თითქმის სრული დაბრუნების შემდეგ, რაც ბუნებრივი პროცესი იყო, ხვალინდელი რეალური, გამართული კავშირებისთვის აუცილებელი პირობაა შეთანხმება ოთხ ტერმინზე: „საქართველო“, „ისრაელი“, „საქართველოს მოქალაქეები“ და „ისრაელელები“ და მათ შორის ურთიერთობებიც სწორედ ამ ფორმატში უნდა წარიმართოს. ამ მხრივ პროგრესი ნამდვილად არის და ამ მიღწევისთვის, რაც ბილატერალურ და ორმხრივ ინტერესებს ემსახურება, იციკ მოშე მადლობას უხდის ქნესეთსა და პარლამენტში შესაბამის მეგობრობის ჯგუფებს.
„მსოფლიო ამჟამად რთულ პერიოდს გადის. გამოწვევებია ისრაელისა და მისი მეგობარი ქვეყნების წინაშეც. „ისრაელის სახლი“ მუშაობს 18 ქვეყანაში და მიზნად ისახავს ისრაელისადმი სოლიდარობის გაძლიერებას, რომელიც ასევე აისახება მეგობარი ქვეყნების კანონმდებლობაშიც. მეორე მიმართულება ბილატერალური ეკონომიკური ურთიერთობების ხელშეწყობაა, რაც ბიძგს მისცემს, აგრეთვე, მეგობარი ქვეყნების ეკონომიკას“, - ამბობს იციკ მოშე.