საქართველოს ეროვნული ბანკი ინტერაქტიული სტრეს-ტესტის განახლებულ შედეგებს აქვეყნებს, სადაც სხვადასხვა სტრესული სცენარის შემთხვევაში ბანკების კაპიტალის დინამიკაა წარმოდგენილი. ინტერაქტიული სტრეს-ტესტი ყოველწლიურად განახლებადი ინსტრუმენტია, რომელიც კომერციული ბანკების ფინანსური გამჭვირვალობის გაზრდას უწყობს ხელს. ინტერაქტიული პლატფორმის მეშვეობით, დაინტერესებულ საზოგადოებას თავად შეუძლია თითოეული მაკროეკონომიკური ცვლადისთვის ჰიპოთეტური სტრესული სცენარის არჩევა და კომერციული ბანკის კაპიტალის კოეფიციენტის დინამიკაზე დაკვირვება. შესაბამისად, აღნიშნული ინსტრუმენტი მომხმარებლებსა და ინვესტორებს საშუალებას აძლევს თავად შეაფასონ საბანკო სექტორის მაკროფინანსურ შოკებთან გამკლავების უნარი.
სტრეს-ტესტის შედეგების მიხედვით, ზომიერი და მკაცრი სტრეს სცენარის შემთხვევაში, საკრედიტო დანაკარგების მიუხედავად, ყველა ბანკი მდგრადობას ინარჩუნებს. მიმდინარე მდგომარეობით, საბანკო სექტორი, წინა წელთან შედარებით, მეტად კაპიტალიზებულია, შედეგად გაზრდილია საბანკო სექტორის მდგრადობა შოკების მიმართ და გაუმჯობესებულია ინტერაქტიული სტრეს ტესტის შედეგებიც. ექსტრემალური სტრეს სცენარის დროს მხოლოდ ერთი ბანკი საჭიროებს დამატებით კაპიტალს, რამდენიმე ბანკისთვის კი პირველადი კაპიტალი მინიმალური მოთხოვნის დონეზე ნარჩუნდება. საბანკო სექტორი ექსტრემალური სცენარის პირობებშიც აკმაყოფილებს კაპიტალის მინიმალურ მოთხოვნას. ინტერაქტიული სტრეს ტესტის დეტალური შედეგები მაკროეკონომიკური სცენარების სხვადასხვა კომბინაციისთვის შეგიძლიათ იხილოთ ეროვნული ბანკის ვებ-გვერდზე. მნიშვნელოვანია აღინიშნოს, რომ ინტერაქტიული სტრეს ტესტის სიმულაციის ჩატარებისას გამოყენებულია 2023 წლის მეორე კვარტალის მონაცემები. 2023 წლის 1 იანვრიდან ანგარიშგების სტანდარტების ცვლილების შემდეგ, ე.წ. ადგილობრივი GAAP და ფასს 9 სტანდარტებით პარალელური ანგარიშგება დროებით, მხოლოდ 2023 წლის ივნისის ჩათვლით შენარჩუნდა. სტრეს ტესტის არსებული მეთოდოლოგია კი ადგილობრივ GAAP სტანდარტებს ეფუძნება. სწორედ ამიტომ, ინტერაქტიულ სტრეს ტესტში საწყის წერტილად აღებულია 2023 წლის ივნისის მონაცემები, რაც GAAP ანგარიშგებით წარმოდგენილი უახლესი ხელმისაწვდომი მონაცემებია.
აღსანიშნავია, რომ სტრეს სცენარები და სტრეს-ტესტის დაშვებები არ არის და არ შეიძლება ჩაითვალოს ეროვნული ბანკის პროგნოზებად. ეს დაშვებები მხოლოდ თეორიული სიმულაციაა, რომელიც, მათი რეალიზაციის შემთხვევაში, ფინანსური სექტორის მდგრადობის შესაფასებლად გამოიყენება. სტრეს-ტესტის განმარტებიდან და მიზნიდან გამომდინარე, სცენარები, რომლებსაც სტრეს ტესტი ეფუძნება უნდა იყოს საკმარისად მძიმე, ნაკლებ სავარაუდო, თუმცა დასაშვები. აღსანიშნავია ისიც, რომ აღნიშნული სტრეს-ტესტი არ განიხილავს ბანკების მხრიდან შოკების საპასუხოდ აქტიურ რეაგირებას ან ბიზნეს მოდელის ცვლილებას, რამაც შესაძლოა შოკის გავლენა შეარბილოს. სტრეს-ტესტის ძირითადი მახასიათებლების შესახებ დეტალური ინფორმაცია განთავსებულია ეროვნული ბანკის ვებგვერდზე.
