სეპარატისტების მიერ ახალგორის რაიონის მოსახლეობის ე.წ. პასპორტიზაციის პროცესი 2011 წელს გაგრძელდება. ინფორმაციას ამის შესახებ ე. წ. სამხრეთ ოსეთის ბეჭდვისა და ინფორმაციის კომიტეტი ავრცელებს.
ახალგორის რაიონის ე.წ. საპასპორტო სამსახურის უფროსის მაია ძუგაევას ინფორმაციით, ე. წ. პასპორტიზაციის პროცესის დასრულება მიმდინარე წელს იგეგმებოდა, თუმცა ვერ მოხერხდა.
"ლენინგორის რაიონის მოსახლეობის პასპორტიზაციის პროცესის 2011 წელს გაგრძელდება. ჩვენ ვგეგმავდით დროებითი მოწმობები - ფორმა # 9-ის გაცემა მიმდინარე წლის ბოლოსთვის დაგვესრულებინა, თუმცა ვერ ვასწრებთ, ამიტომაც ეს პროცესი 2011 წელს გაგრძელდება", _ აცხადებს ძუგაევა და აღნიშნავს, რომ დაბადების მოწმობების ქართული ენიდან ოსურ ენაზე თარგმნას დიდი დრო მიაქვს.
"სამუშაო ძალიან ბევრია. დაბადების მოწმობების ქართული ენიდან ოსურ ენაზე თარგმნას, სამისამართო ფურცლის გაფორმებას, სტატისტიკური ტალონის შექმნას დიდი დრო მიაქვს. ფორმა #9-ის ფასი 35 რუსული რუბლია. ამასთან, ყველა მომსახურების საფასური მოქალაქეთა მოსახერხებლობისთვის შემცირებულია", _ აცხადებს ძუგაევა.
