ევროპული საქართველოს თავმჯდომარე, გიგა ბოკერია ლაზარე გრიგორიადისისთვის წინასწარი პატიმრობის შეფარდებას ეხმაურება.
როგორ გიგა ბოკერიამ აღნიშნა, დაკავებული ივანიშვილის რეჟიმმა იმ პროპაგანდით, რაც აწარმოა, თვითონ აქცია სიმბოლოდ, იმის მიუხედავად თუ რა კონკრეტულ მტკიცებულებები იქნება გასაჯაროვებული ამ კონკრეტულ საქმესთან დაკავშირებით, რომლებიც ჯერ-ჯერობით საერთოდ არც გვიხილავს და არც ვიცით.
„ის, რაც უკვე ვიცით კობახიძის ამაზრზენი განცხადებიდან, მათი პროპაგანდიდან და იქიდან, თუ რა ნიშნით შეარჩიეს ეს ახალგაზრდა ადამიანი, ეს უკვე ამ რეჟიმის ბოროტების სიმბოლოა. მხოლოდ ამიტომაც კი უკვე ამ ბიჭის ბედი იქცა პრინციპულ საკითხად ჩვენი საზოგადოებისთვის“ - თქვა გიგა ბოკერიამ.
ლაზარე გრიგორიადისს საქალაქო სასამართლომ წინასწარი პატიმრობა შეუფარდა. შემდეგი სხდომა 1-ლ მაისს ჩაინიშნა.
პოლიციამ გრიგორიადისი 29 მარტს დააკავა. პროკურატურის მტკიცებით, 7 მარტს დაახლოებით 23:15 საათზე, შოთა რუსთაველის გამზირზე გამართული აქციის მიმდინარეობისას, გრიგორიადისმა 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით ორჯერ ისროლა ე.წ. მოლოტოვის კოქტეილი.
უწყება დაკავებულს ასევე ედავება, რომ მან 9 მარტს, ღამის საათებში ჭანტურიას ქუჩაზე განზრახ წაუკიდა ცეცხლი შინაგან საქმეთა სამინისტროს კუთვნილ ტოიოტა კოროლას მოდელის ავტომანქანას.
გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის "ა" ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს.