გაეროს ქალთა ორგანიზაციის, საქართველოს საფონდო ბირჟისა და საერთაშორისო საფინანსო კორპორაციის (IFC) მხარდაჭერით, საქართველო ყოველწლიურ გლობალურ ინიციატივას „დარეკე ზარი გენდერული თანასწორობისთვის“ კიდევ ერთხელ შეუერთდება. სპეციალური ღონისძიება, რომელიც უკვე ტრადიციად იქცა, ამჯერად ქალების საჭიროებებზე მორგებული ფინანსური პროდუქტებისა და სერვისების მნიშვნელობას, ასევე, მათი შემუშავების პროცესში გენდერული ფაქტორების გათვალისწინებას მიეძღვნება.
ღონისძიებაში მონაწილეობას მიიღებენ: გაეროს ქალთა ორგანიზაციის წარმომადგენელი საქართველოში კაორი იშიკავა, IFC-ის რეგიონული მენეჯერი სამხრეთ კავკასიაში ივანა ფერნანდეს დუარტე, ნორვეგიის საელჩოს მისიის ხელმძღვანელის მოადგილე მარკო სოლდიჩი, საქართველოს საფონდო ბირჟის დირექტორის მოვალეობის შემსრულებელი ნინო ქურდიანი, საქართველოს ეროვნული ბანკის ვიცე-პრეზიდენტი პაპუნა ლეჟავა, საერთაშორისო და ადგილობრივი საფინანსო სექტორის წარმომადგენლები და ბიზნესგაერთიანებების წევრები.
საქართველოში ქალები ფინანსებზე ხელმისაწვდომობის პროცესში არაერთ ბარიერს აწყდებიან: ხშირად მათ ფინანსური უზრუნველყოფისთვის აუცილებელ ქონებაზე ხელი არ მიუწვდებათ, არ აქვთ ბიზნესის დაწყებისა და განვითარებისთვის საჭირო ცოდნა, უნარები და კავშირები, კვლავაც უწევთ საზოგადოებაში არსებულ სტერეოტიპებთან გამკლავება და ა.შ. შესაბამისად, გენდერული თავისებურებების გათვალისწინებას ქალთა მეწარმეობის ხელშეწყობაში მნიშვნელოვანი როლის შესრულება შეუძლია.
პანელურ დისკუსიაზე საერთაშორისო საფინანსო ინსტიტუტების წარმომადგენლები ყურადღებას ისეთ თემებზე გაამახვილებენ, როგორებიცაა გენდერულად მგრძნობიარე ფინანსური პროდუქტები და სერვისები, მეწარმე ქალების გამოწვევები საქართველოში და ა.შ. პანელური დისკუსიის შემდეგ თურქეთის ერთ-ერთი ყველაზე დიდი ბანკიდან, TEB-დან მოწვეული ექსპერტები ქართველ კოლეგებთან სამუშაო შეხვედრას გამართავენ, რომლის მიმდინარეობისასაც მათ ქალებზე მორგებული პროდუქტებისა და სერვისების შექმნის პროცესის თავისებურებებს პრაქტიკულად გააცნობენ.
ინიციატივა პროექტის „კარგი მმართველობა გენდერული თანასწორობისთვის საქართველოში“ ქალთა ეკონომიკური გაძლიერების კომპონენტის ნაწილია, რომელიც ნორვეგიის მთავრობის მხარდაჭერით ხორციელდება.
ღონისძიება სასტუმრო „რედისონ ბლუ ივერიაში“ 31 მარტს, 9:00 საათზე დაიწყება.