ავსტრია, როგორც რომის სტატუტის მონაწილე, შეასრულებს თავის ვალდებულებებს და დააკავებს რუსეთის პრეზიდენტს ვლადიმირ პუტინს და სისხლის სამართლის საერთაშორისო სასამართლოს გადასცემს, თუ ის ავსტრიაში ჩავა. ამის შესახებ ავსტრიის საგარეო საქმეთა სამინისტროში განაცხადეს.
„ავსტრია რომის სტატუტის წევრია, ეს იმას ნიშნავს, რომ ავსტრია, ისევე, როგორც შეთანხმების სხვა მხარეები, ვალდებულია ითანამშრომლოს სისხლის სამართლის საერთაშორისო სასამართლოსთან: სასამართლოს მიერ გაცემული დაკავების ორდერი უნდა აღსრულდეს, სასამართლოს მიერ ძებნილი პირები კი უნდა დააკავონ“, - განაცხადეს უწყებაში.
17 მარტს სისხლის სამართლის საერთაშორისო სასამართლომ ვლადიმირ პუტინის დაკავების ორდერი გასცა.
სისხლის სამართლის საერთაშორისო სასამართლოს მოსამართლეების გადაწყვეტილებით, რუსეთის პრეზიდენტი უკრაინაში ომის დანაშაულების ჩადენაშია ეჭვმიტანილი.
როგორც სასამართლოს განცხადებაშია ნათქვამი, რუსეთის პრეზიდენტი, „სავარაუდოდ, არის პასუხისმგებელი ომის დანაშაულზე, მოსახლეობის (ბავშვების) უკანონო დეპორტაციაზე და მოსახლეობის (ბავშვების) უკანონო გადაყვანაზე უკრაინის ოკუპირებული ტერიტორიებიდან რუსეთის ფედერაციაში“.
სასამართლომ, ასევე ბავშვთა უფლებების საკითხებში რუსეთის კომისრის, მარია ალექსეევნა ლვოვა-ბელოვას დაპატიმრების ორდერიც გასცა.