ვფიქრობ, პოლიტიკოსებს გვაქვს პასუხისმგებლობა, ვიმუშაოთ იმ ატმოსფეროში, რომელიც არ მოგვწონს. ვისურვებდი, საქართველოს პარლამენტში სრული სამუშაო შემადგენლობით იყოს წარმოდგენილი „ნაციონალური მოძრობა“, – ამის შესახებ „ნაციონალური მოძრაობის“ წევრმა, ხატია დეკანოიძემ განაცხადა.
დეკანოიძის თქმით, მის მიერ მიღებული ნებისმიერი პოლიტიკური სახის გადაწყვეტილებასაუცილებლად იქნება საზოგადოებისთვის ცნობილი.
„მე დარღვეული მაქვს ბოიკოტი, არ ვიზიარებ ბოიკოტის პოზიციას. აზრთა სხვადასხვაობა მაქვს და მქონდა ჩემს კოლეგებთან. გუშინაც დავადასტურე საკმაოდ მძიმე საუბრები. ვფიქრობ, ჩემი პოზიცია არის სწორი, რომელიც უნდა იყოს გათვალისწინებული არა იმიტომ, რომ მე განსაკუთრებული ვარ, არამედ იმიტომ, რომ ეს არის ჩვენი პასუხისმგებლობა და ძალიან მნიშვნელოვანია ამ პასუხისმგებლობის აღება. 12 პუნქტზე მუშაობა იმას კი არ ნიშნავს, რომ „ქართული ოცნება“ იმას გააკეთებს, რაც ჩვენ გვინდა ან მოქალაქეებს სურთ, 12 პუნქტზე მუშაობა ნიშნავს, ჩვენი წილი პასუხისმგებლობა ავიღოთ. ჩემს გადაწყვეტილებას, მათ შორის ნებისმიერი პოლიტიკური სახის გადაწყვეტილებას, აუცილებლად გამცნობთ. ნებისმიერი გადაწყვეტილება აუცილებლად იქნება საზოგადოებისთვის ცნობილი, ყველა ნიუანსი და ყველა მიზეზიც. ამაზე ნაფიქრი მაქვს იმ კონტექსტში, რომ ბოიკოტი არ მიმაჩნია გზად, ამიტომ შევხედოთ, როგორ გაგრძელდება“, – განუცხადა ხატია დეკანოიძემ ჟურნალისტებს.