მე გუშინ ვთქვი და კიდევ განვაცხადებ, რომ არანაირი თეორიული საფრთხე უმრავლესობას არ ემუქრება, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ განაცხადა.
როგორც მდინარაძემ აღნიშნა, გრეტა წიწავას პარლამენტში შემოსვლის შემდეგ ფრაქცია „ქართული ოცნების“ წევრები საქართველოს პარლამენტის ნახევარს შეადგენენ, ხოლო უმრავლესობა „ხალხის ძალის“ წევრების მეშვეობით აქვთ.
მისი თქმით, უმრავლესობას არანაირი საფრთხე არ ემუქრება.
„მოგეხსენებათ, საქართველოს პარლამენტში „ქართულ ოცნებას“, იმ ფრაქციას, რომელსაც მე ვხელმძღვანელობ, აღარ აქვს საპარლამენტო უმრავლესობა. ანუ, დღეს ქალბატონი გრეტა რომ დაგვემატა, საქართველოს პარლამენტის ნახევარს – 75 წევრს შეადგენს ჩვენი ფრაქცია „ქართული ოცნება“. უმრავლესობა დღეს უკვე შედგება ფრაქცია „ქართული ოცნებისა“ და ჩვენგან გასული დეპუტატებისგან ანუ, „ხალხის ძალის“ წარმომადგენლებისგან. აქ უკვე ჩვენ გვაქვს მყარი უმრავლესობა და მათი პირობა, რომელშიც ერთი პროცენტითაც კი ეჭვი არ გვეპარება, არის ის, რომ ისინი უმრავლესობის ყველა საკითხს დაუჭერენ მხარს. ჩვენ ერთი საკითხის განსხვავებაზე ბევრი ვილაპარაკეთ, ამიტომ ჩვენს ერთობას უმრავლესობის ფორმატში არანაირი საფრთხე არ ემუქრება. შესაბამისად, თუკი ვინმეს უნდა, რომ ამას რაიმე ეჭვი მოაყოლოს, ეს ეჭვი გამორიცხულია, რისკები დაზღვეულია. ისინი უმრავლესობის ყველა გადაწყვეტილებას მხარს უჭერენ და მონაწილეობას უმრავლესობის ფორმატებში იღებენ. მაგალითად, უმრავლესობის სხდომებზე და ა.შ. როგორც ამას აკეთებდნენ აქამდე. ის ერთი საკითხი გასაგებია, გამიჯნულები ვართ და დანარჩენ საკითხში ჩვენ ურყევად ვთანამშრომლობთ და აქ პრობლემები არ არის“, – განაცხადა მდინარაძემ.
