ჩერნობილის ატომურ ელეტქროსადგურზე ვითარება სახიფათოა, რადგან ოკუპანტების ქმედებების გამო სადგურს არ მიეწოდება ელექტროენერგია და არავინ იცის ახლა იქ რა სიტუაციაა. ამის შესახებ პრეზიდენტის ოფიის ხელმძღვანელის მრჩეველმა მიხაილო პოდოლიაკმა მედიას განუცხადა.
„ჩერნობილში ვითარება საერთო ჯამში ძალიან სახიფათოა. ოკუპანტების ქმედებების გამო იქ შეწყვეტილია ობიეტქების სტაბილური ენერგომომარაგება. ეს საფრთხეა მთელი ევროპისთვის და რა თქმა უნდა, თავად რუსეთისთვის“, - განაცხადა პოდოლიაკმა.
ამასთან, აღნიშნა, რომ ატომური ენერგიის საერთაშორისო სააგენტო ვერ იღებს აუცილებელ მონაცემებს უსაფრთხოების კონტროლის სისტემებიდან და არ იცის, რა ხდება ჩერობილის ატომურ ელექტროსადგურზე.
პოდოლიაკი ამბობს, რომ მსოფლიომ ზეწოლა უნდა გააძლიეროს რუსეთზე, რათა ოკუპანტებმა დაუყოვნებლივ დატოვონ უკრაინა. მისივე განცხადებით, რუსეთმა მეზობელი ქვეყნის წინააღმდეგ ომი შუა საუკუნეების სულისკვეთებით დაიწყო და გასაკვირი არ არის, რომ ბომბავენ ატომურ ბლოკებს, ბირთვულ ობიექტებს, ანადგურებენ ენერგომომარაგებას. პოდოლიაკი აღნიშნავს, რომ აღნიშნული ობიექტები რუსეთმა, შესაძლოა შანტაჟის სახით გამოიყენოს.
"რაც უფრო დიდხანს დარჩება რუსული არმია ჩვენი ქვეყნის ტერიტორიაზე, მით უფრო მეტ პრობლემას შეუქმნიან ეს შუასაკუნეების ადამიანები ევროპასა და თავისივე ქვეყანას“, - განაცხადა პოდოლიაკმა.
