ნინო სურგულაძის ფონდი "ნატვრის ხე“ საქველმოქმედო აქციას დღეიდან იწყებს. მორიგი აქციის ფარგლებში, 240 სოციალურად დაუცველ ოჯახს 100-ლარიანი ვაუჩერები - "სიკეთის ბარათი" გადაეცემათ.

65000-ზე ნაკლები სარეიტინგო ქულის მქონე სოციალურად დაუცველი ოჯახები, რომელთაც ერთი 16 წლამდე ასაკის შშმპ ჰყავთ, სოციალური მომსახურების სააგენტოსა და ნინო სურგულაძის ფონდის "ნატვრის ხე“ ერთობლივი საქველმოქმედო აქციის ფარგლებში, 100-ლარიან ვაუჩერებს მიიღებენ.

აქციის ფარგლებში, ჯანდაცვის მინისტრის მოადგილე თამარ ბარკალაია და ნინო სურგულაძე სოციალურად დაუცველ ოჯახს ესტუმრნენ და 100-ლარიანი ვაუჩერი პირადად გადასცეს.

აღნიშნული ვაუჩერით სოციალურად დაუცველი ოჯახები მედიკამენტების, საკვები დანამატების და სხვა შესაბამისი სამედიცინო დანიშნულების საგნების შეძენას შეძლებენ.

„ავერსს“ პროექტში საკუთარი წვლილი შეაქვს - 100-ლარიანი "სიკეთის ბარათების" განაღდების შესაძლებლობა სოციალურად დაუცველ ოჯახებს კომპანია „ავერსის“ სააფთიაქო ქსელში ექნებათ.

სოციალური მომსახურების სააგენტომ შესაბამისი კრიტერიუმების მიხედვით სულ 240 ოჯახი შეარჩია.

"სიკეთის ბარათების" დარიგებას სააგენტო თავად უზრუნველყოფს. 100-ლარიანი ვაუჩერების მიღების მიზნით სოციალურად დაუცველი ოჯახი შესაბამის განცხადებას შეავსებს.

საქველმოქმედო აქცია დღეიდან დაიწყება და მარტის ბოლომდე გაგრძელდება.

ნინო სურგულაძის საერთაშორისო საქველმოქმედო ფონდი “ნატვრის ხე“ 7 წლის წინ შეიქმნა.

ამ დროის განმავლობაში საქველმოქმედო კონცერტებით, საზოგადოების და მსოფლიო ვარსკვლავების ჩართულობით, ნინო სურგულაძემ 120-ზე მეტ ბავშვს აჩუქა სიცოცხლე, ბავშვების უმრავლესობას საზღვარგარეთ მკურნალობა დაუფინანსდა და ურთულესი ოპერაციები ჩაუტარდათ. ასევე ფონდმა დახმარება გაუწია სოციალურად დაუცველ ათასამდე ოჯახს.

ნატვრის ხის საქველმოქმედო ანგარიშის ნომერი:

სს თიბისი ბანკი ა/ა GE18TB7276636080100005

საქველმოქმედო ტელეფონის ნომერი 09 01 900 999; ზარის ღირებულება 1 ლარი.