მიხეილ სააკაშვილის ჯანმრთელობის მდგომარეობა, სასამართლო პროცესზე დასწრებას ხელს არ შეუშლის - ამის შესახებ ცენტრ "ემპათიის" ხელმძღვანელმა, მარიამ ჯიშკარიანმა განცხადა, რომელმაც საქართველოს მესამე პრეზიდენტი გორის ჰოსპიტალში მოინახულა.
ჯიშკარიანის თქმით, მიხეილ სააკაშვილი მკურნალობასა და რეაბილიტაციას კვლავ საჭიროებს.
"ჩვენ გავესაუბრეთ მიხეილ სააკაშვილს. მოხდა სამედიცინო გასაუბრება, ასევე გასინჯვა. გავეცანით სამედიცინო დოკუმენტაციის ნაწილს. ხვალ კიდევ მოვალთ. რაც შეეხება ჯანმრთელობის მდგომარეობას, ჩვენი მოსაზრებით, ის სასამართლო პროცესზე წასვლას ხელს არ შეუშლის. პაციენტი, რა თქმა უნდა, კიდევ საჭიროებს მკურნალობას და რეაბილიტაციას. ჩვენ მკურნალობის თაობაზე კიდევ შევჯერდებით. ჩვენ ჩვენი რეკომენდაციები გვაქვს მკურნალობასა და გამოკვლევებთან დაკავშირებით, თუმცა ეს არ შეუშლის სასამართლო პროცესზე წასვლაში. პაციენტს სჭირდება მულტიდისციპლინური მიდგომა მკურნალობაზე, საერთაშორისო სტანდარტების გათვალისწინებით. განსაკუთრებული ფსიქოლოგიური დახმარება არ სჭირდება", - განაცხადა მარიამ ჯიშკარიანმა.
მიხეილ სააკაშვილის სასამართლო სხდომა, 7 ნოემბრის საქმეზე, 29 ნოემბერს არის ჩანიშნული. როგორც ადვოკატები იუწყებიან, მიხეილ სააკაშვილს სურს პირადად დაესწროს საქმის განხილვას, თუმცა ჯერჯერობით სპეციალური პენიტენციური სამსახურის გადაწყვეტილება უცნობია.
