სახელმწიფო ინსპექტორის სამსახური დადებითად აფასებს პატიმრობის კოდექსში და არასრულწლოვანთა მართლმსაჯულების კოდექსში შეტანილ საკანონმდებლო ცვლილებებს.
საქართველოს პარლამენტის მიერ განხორციელებული და დღეის მდგომარეობით ძალაში შესული საკანონმდებლო ცვლილებების თანახმად:
პენიტენციურ დაწესებულებებში მოთავსებულ ბრალდებულებს და მსჯავრდებულებს სახელმწიფო ინსპექტორის სამსახურის ცხელ ხაზზე დარეკვა ნებისმიერ დროს, შეუზღუდავად შეუძლიათ. სახელმწიფო ინსპექტორის სამსახურის ცხელი ხაზის სატელეფონო ნომერზე დაკავშირება აღარ აკლდება პატიმრობის კოდექსით და არასრულწლოვანთა მართლმსაჯულების კოდექსით მსჯავრდებულთათვის/ბრალდებულთათვის დაწესებულ სატელეფონო საუბრის ლიმიტებს;
პენიტენციურ დაწესებულებაში მოთავსებულ პირებს სახელმწიფო ინსპექტორის სამსახურის ცხელ ხაზთან დაკავშირება შეუძლიათ მაშინაც კი, როცა გამომძიებლის ან პროკურორის მიერ მათ შეზღუდული აქვთ სატელეფონო საუბრის უფლება. აღნიშნული უფლება მსჯავრდებულს/ბრალდებულს უნარჩუნდება დისციპლინური სახდელის სახით სატელეფონო საუბრის უფლების შეზღუდვის მოქმედების პერიოდშიც და სამარტოო საკანში მოთავსების დროსაც;
ბრალდებულებისა და მსჯავრდებულების სახელმწიფო ინსპექტორის სამსახურის ცხელ ხაზთან დაკავშირების ხარჯების ანაზღაურებას პენიტენციური დაწესებულება უზრუნველყოფს.
პატიმრობის კოდექსში და არასრულწლოვანთა მართლმსაჯულების კოდექსში საქართველოს პარლამენტის მიერ განხორციელებული საკანონმდებლო ცვლილებები, მნიშვნელოვნად შეუწყობს ხელს სახელმწიფო ინსპექტორის სამსახურისთვის, მისი ქვემდებარე დანაშაულების შესახებ, ინფორმაციის დროულად მოწოდებას, რაც ეფექტიანი გამოძიების ერთ-ერთი აუცილებელი წინაპირობაა.
სახელმწიფო ინსპექტორის სამსახურის ცხელი ხაზის ნომერია 199, რომელიც ხელმისაწვდომია დღე-ღამის ნებისმიერ დროს. შესაბამისად, პენიტენციურ დაწესებულებაში მოთავსებულ მსჯავრდებულებს/ბრალდებულებს აღნიშნულ ნომერზე დაკავშრება 24 საათის განმავლობაში შეუძლიათ.
