შინაგან საქმეთა სამინისტროს სასაზღვრო პოლიციის სანაპირო დაცვის დეპარტამენტის დირექტორმა, I რანგის კაპიტანმა რამაზ პაპიძემ საზღვაო ოპერაციების ერთობლივი მართვის ცენტრში (JMOC) დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიან ელჩს - მარკ კლეიტონს დელეგაციასთან ერთად უმასპინძლა.
მხარეებმა ორ ქვეყანას შორის არსებულ საზღვაო თანამშრომლობაზე, ასევე, მიმდინარე და დაგეგმილ ერთობლივ ღონისძიებებსა და პროექტებზე ისაუბრეს. I რანგის კაპიტანმა რამაზ პაპიძემ დიდი ბრიტანეთის ელჩს JMOC-ის მიზნებისა და საქმიანობის შესახებ დეტალური ინფორმაცია მიაწოდა. შეხვედრაზე ყურადღება განსაკუთრებით გამახვილდა თანამშრომლობის სხვადასხვა მიმართულებით გაღრმავებაზე.
საქართველოს სანაპირო დაცვას გაერთიანებულ სამეფოსთან საზღვაო უსაფრთხოების სფეროში მჭიდრო თანამშრომლობა აკავშირებს. ბრიტანული ხომალდები საქართველოს ტერიტორიულ წყლებს რეგულარულად სტუმრობენ. საპორტო ვიზიტების ფარგლებში იმართება ერთობლივი წვრთნები, რაც ეკიპაჟებს შორის ურთიერთქმედების გაუმჯობესებასა და სანაპირო დაცვის შესაძლებლობების განვითარებას ემსახურება.
