გერმანიის მთავრობამ საქართველოს გამოუგზავნა ფირმა Roche-ს წარმოების კოვიდის საწინააღმდეგო წამლების Casirvimab-ისა და Imdevimab-ის 3024 დოზა. იტყობინება საქართველოში გერმანიის საელჩო.
წამლები, რომლებიც ფირმა DB Schenker-მა ჩამოიტანა საქართველოში, გასულ კვირაში გერმანიის ელჩმა ჰუბერტ ქნირშმა ოფიციალურად გადასცა საქართველოს ჯანდაცვის მინისტრს ეკატერინე ტიკარაძეს.
"მაღალი ხარისხის ეს მედიკამენტები განკუთვნილია კოვიდით დაავადებული მძიმე პაციენტების სამკურნალოდ. დიდი იმედი მაქვს, რომ ამ წამლების მეშვეობით შესაძლებელი იქნება ადამიანების სიცოცხლის გადარჩენა. მაგრამ კოვიდთან ბრძოლაში უფრო მნიშვნელოვანია, რომ საქართველოში უფრო მეტმა ადამიანმა გაიკეთოს ვირუსის საწინააღმდეგო აცრა", - განაცხადა წამლების გადაცემისას გერმანიის ელჩმა.
