სახელმწიფო სერვისების განვითარების სააგენტო პასუხობს ბლოკის - "ერთიანი ნაციონალური მოძრაობა - გაერთიანებული ოპოზიცია "ძალა ერთობაშია" - წევრის, თამარ კორძაიას მიერ მედიაში გავრცელებულ ბრალდებას, რომლის თანახმადაც, დამკვირვებლებმა გაყალბებული დოკუმენტების საფუძველზე ხმის მიცემის ფაქტი აღმოაჩინეს.
უწყების განცხადებით, კორძაიამ ცრუ ბრალდება გაავრცელა.
სააგენტო განმარტავს, რომ კორძაიას მიერ ხსენებული მოქალაქე ედუარდი მსტოიანი ამომრჩეველთა ერთიან ბაზაში მხოლოდ ერთი მონაცემითაა შეყვანილი. ედუარდ მსტოიანმა 22 ოქტომბერს ანა ჯიქურთან ქორწინების რეგისტრაციის შემდეგ მიიღო მეუღლის გვარი - ჯიქური.
"გვარის შეცვლა განხორციელდა 14 სექტემბრის ანუ ცესკოსთვის საარჩევნო სიის გადაცემის შემდეგ. იგი საარჩევნო სიაში ძველი სახელით და გვარით არის დაფიქსირებული.
აქვე განვმარტავთ, რომ ახალი პირადობის ელექტრონული მოწმობის აღების შემდეგ, მიმდინარე წლის 22 ოქტომბერს, ძველი პირადობის მოწმობა გაუქმდა. სახელმწიფო სერვისების განვითარების სააგენტო მოუწოდებს ყველას, თავი შეიკავონ გადაუმოწმებელი ინფორმაციის გავრცელებისგან", - ნათქვამია განცხადებაში.
ცოტა ხნით ადრე, თამარ კორძაიამ საგანგებო ბრიფინგი ჩაატარა და განაცხადა, რომ აღმოაჩინეს გაყალბებული პირადობის მოწმობები, რომლის მეშვეობითაც არჩევნები ყალბდებოდა.
"დღეს ამ მტკიცებულებით დასტურდება ის, რასაც წლების განმავლობაში ვამტკიცებთ, რომ გაყალბებული პირადობის მოწმობებით საქართველოს ხელისუფლება აყალბებს არჩევნებს. შესაბამისად, დღეს საგამოძიებო უწყებების წინაშე ვაყენებთ სისტემური დანაშაულის გამოძიების მოთხოვნას, მათ შორის, იუსტიციის სამინისტროდან დაწყებული, ცენტრალური საარჩევნო კომისიით დასრულებული", - განაცხადა კორძაიამ.
