საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ორგანიზებითა და ბულგარეთში საქართველოს საელჩოსთან თანამშრომლობით ბულგარეთის მაღალრეიტინგული ტელეკომპანიების, გამოცემებისა და საინფორმაციო სააგენტოების რედაქტორები და ჟურნალისტები საქართველოს ეწვივნენ.
ტურის მონაწილეებს შორისაა საერთაშორისო ჟურნალის Vagabond-ის ბულგარული გამოცემის რედაქტორი ენტონი გეორგიევი. პრეს-ტურის მიზანი ბულგარეთში საქართველოს ტურისტული პროდუქტების პოპულარიზაცია და ტურისტული ნაკადების მოზიდვაა.
"საქართველო ბულგარეთიდან მასპინძლობს მაღალრეიტინგული ტელევიზიების, ბეჭდური მედიის წარმომადგენლებს. ძირითადი აქცენტი ჩვენი კულტურული მემკვიდრეობის შესახებ გაკეთდება, მომზადდება სიუჟეტები და სტატიები, რომელიც ბულგარეთში სხვადასხვა არხებისა და გამოცემების საშუალებით გავრცელდება.“-აცხადებს ტურიზმის ეროვნული ადმინისტრაციის ხელმძღვანელის მოვალეობის შემსრულებელი მედეა ჯანიაშვილი.
"პირველ რიგში გეტყვი, რომ საქართველოში 6 ან 7 წლის წინაც ვიყავი და ბევრი ადგილი ვნახე, მაგრამ დღეს თბილისით გაოცებული ვარ, ძალიან შეცვლილა, უფრო ლამაზია, ბევრი რამ განახლდა და ვფიქრობ ერთ-ერთი ულამაზესი ქალაქია ევროპაში. რა თქმა უნდა თბილისი უსაფრთხო ქალაქია, ისევე როგორც სხვა ადგილები საქართველოში", - ამბობს ენტონი გეორგიევი, ჟურნალ “Vagabond”-ის რედაქტორი.
"საქართველოში პირველად არ ვარ, 20 წლის წინ ვიყავი, ახლა ყველაფერი შეცვლილია, ძალიან მოვიხიბლე თბილისით, აქ ვნახე ძალიან მეგობრული, ომღიმარი ხალხი. დარწმუნებული ვარ ძალიან ბევრი ბულგარელი ტურისტული ეწვევა საქართველოს, როგორც კი დაინიშნება პირდაპირი ავიარეისი. პანდემიის მიუხედავად ვფიქრობ საქართველო უსაფრთხოა, ყველა ატარებს ნიღაბს, საზღვარზე ამოწმებენ ვაქცინირებთა საბუთებს და მათ ვისაც PCR-ტესტი აქვს გაკეთებული", - აცხადებს ტურის მონაწილე ტელეწამყვანი მაგდალენა გიგოვა.
5 დღიანი ტურის ფარგლებში ბულგარელი ჟურნალისტები თბილისს, უფლისციხეს, ახალციხეს, საფარას მონასტერს, ვარძიას, ფოკას და სამცხე-ჯავახეთის სხვა ტურისტულად მნიშვნელოვან ადგილებს მოინახულებენ.
ტურის დასრულების შემდეგ ბულგარელი ჟურნალისტები საქართველოს ტურიზმის, კულტურის, ისტორიული ძეგლებისა და ბუნების შესახებ სატელევიზიო სიუჟეტებს, ბლოგებსა და სტატიებს მოამზადებენ, რომელსაც ბულგარეთში ათიათასობით ტელე მაყურებელი და მკითხველი გაეცნობა.
