სვანეთში დაკარგული ალპინისტი მამა-შვილის ცხედრები იპოვეს.
„შინაგან საქმეთა სამინისტროს საზოგადოებრივი უსაფრთხოების მართვის ცენტრ "112"-ში შემოვიდა შეტყობინება მესტიაში, მწვერვალ უშბაზე გაუჩინარებული უცხოეთის ორი მოქალაქის შესახებ. ინიციატორის ინფორმაციით მთამსვლელებთან ვერ ხერხდებოდა დაკავშირება, უცნობი იყო მათი მდგომარეობა და საჭირო იყო სახანძრო-სამაშველო ძალების დახმარება.
შეტყობინებაზე რეაგირება მოახდინა საგანგებო სიტუაციების მართვის სამსახურმა და დაიწყო აქტიური საძიებო-სამაშველო ღონისძიებები. უამინდობის და რთული გარემო პირობების გამო, მაშველებს მწვერვალზე ქვეითად გადაადგილება უწევდათ. საძიებო-სამაშველო ღონისძიებაში შსს სასაზღვრო პოლიციის ვერტმფრენიც ჩაერთო.
საგანგებო სიტუაციების მართვის სამსახურის მაშველებმა, საძიებო ოპერაციის ფარგლებში, მწვერვალ უშბაზე ორი ადამიანის ცხედარი აღმოაჩინეს. ცხედრები გადმოსვენებულია მესტიაში და ტარდება შესაბამისი პროცედურები“,- იტყობინება საგანგებო სიტუაციების მართვის სამსახური.
მოლდოვის მოქალაქეებს უშბაზე 11 დღე ეძებდნენ. მწვერვალზე ლაშქრობისთვის წასული მოლდოველი ალპინისტები 28 აგვისტოს შემდეგ არ გამოჩენილან.
ტურისტების ძებნის ოპერაციაში ჩართულები იყვნენ მაშველები, ვერტმფრენის გამოყენება კი ცუდი ხილვადობის გამო ვერ ხერხდებოდა.
