"ძალიან უცნაურია იმის მოსმენა, რომ გელათის სამონასტრო კომპლექსში შექმნილ ვითარებაზე პარლამენტს არაფერი არ გაუკეთებია"- განაცხადა საქართველოს პარლამენტის რიგგარეშე სესიის პლენარულ სხდომაზე პარლამენტის წევრმა ქეთევან დუმბაძემ, რომელმაც დეპუტატ ანა ნაცვლიშვილის რეპლიკას უპასუხა გელათის სამონასტრო კომპლექსისა და ხელოვნების მუზეუმის ირგვლივ განვითარებულ მოვლენებზე, სადაც დეპუტატმა დაადანაშაულა პარლამენტი აღნიშნულ თემებთან მიმართებით უმოქმედობაში და მოითხოვა მინისტრის თეა წულუკიანის პარლამენტში მოწვევა.
"შევახსენებ ყველას, რომ პარლამენტის პირველი კომიტეტის სხდომა სწორედ გელათის თემას მიეძღვნა, ისევე როგორც პირველი გასვლითი სხდომა, სადაც კომიტეტი ადგილზე გაეცნო ვითარებას. პირადად გახლდით იმ ჯგუფში, სადაც გაიცა ძალიან მკაცრი რეკომენდაციები. ჩვენს ჩარევას მოჰყვა უცხოელი ექსპერტების მოწვევა. ამის შესახებ ინფორმაცია თითქმის ყოველდღიურ რეჟიმში იდება ოფიციალურ გვერდებზე. იგივეს ვიტყვი შალვა ამირანაშვილის სახელობის საქართველოს ხელოვნების მუზეუმზე. კომიტეტის მეორე სხდომა სწორედ მუზეუმის პრობლემატიკას შეეხო. ხელოვნების მუზეუმის წინაშე მდგარი ურთულესი თემების გადასაჭრელად ასევე ჩაერთნენ საერთაშორისო ექსპერტები. მიდის ყოველდღიური მუშაობა და არ შეიძლება შუა გზაში დასკვნების გამოტანა. დაველოდოთ პროცესებს, ექსპერტების საბოლოო დასვნას და შემდგომ ვიმსჯელოთ აღნიშნულ თემაზე" - განაცხადა ქეთევან დუმბაძემ.