თუ ქვეყანას სჭირდება, შეიძლება მტერსაც გაურიგდე, მაგრამ მოღალატეს ვერა, - განაცხადა "ქართული ოცნების" თავმჯდომარემ, ირაკლი კობახიძემ ყოფილ პრემიერ-მინისტრ გიორგი გახარიასთან შესაძლო თანამშრომლობის შესახებ.
მისივე თქმით, ასევე გამორიცხულია კოალიციურ პარტნიორობა "ნაციოანალურ მოძრაობასთან".
„რაც შეეხება პოტენციურ კოალიციურ პარტნიორობას კონკრეტულ პარტიებთან, „ნაციოანალურ მოძრაობასთან“ ეს ჩვენთვის აბსოლუტურად გამორიცხულია. დარწმუნებული ვართ, რომ ის ღირებულებითი შეუთავსებლობა, რაც ჩვენ გვაქვს ამ პარტიასთან, მომავალშიც არ აღმოიფხვრება. ისინი ვერ შეიცვლებიან, ეს საზოგადოებამაც ძალიან კარგად იცის.
რაც შეეხება გახარიას, პირდაპირ გეტყვით, რომ პოლიტიკაში თუ ზოგადად პრაქტიკაში არსებობს მაგალითები, როდესაც მტერთანაც გარიგდებიან ხოლმე. პოლიტიკაში ხდება ასეთი რამ, მაგრამ არავინ არ რიგდება მოღალატესთან. აქედან გამომდინარე, გამორიცხულია. თუ ქვეყანას სჭირდება, შესაძლოა, მტერსაც გაურიგდე, მაგრამ მოღალატეს – ვერა“, – განაცხადა ირაკლი კობახიძემ.
