საქართველოს საგარეო საქმეთა მინისტრი, დავით ზალკალიანი "პირველ არხთან" საუბრისას აცხადებს, რომ "ქართულმა ოცნებამ" 19 აპრილის შეთანხმების ყველა მნიშვნელოვანი ნაწილი პირნათლად შეასრულა.
როგორც დავით ზალკალიანმა აღნიშნა, 19 აპრილის შეთანხმება პირველ რიგში გამიზნული იყო, რომ ქვეყანა მაშინ არსებული ხელოვნური კრიზისიდან გამოსულიყო, პროცესები წასულიყო დეპოლარიზაციისკენ.
„ქართული ოცნების“ ხელისუფლების მხრიდან 19 აპრილის შეთანხმების ყველა მნიშვნელოვანი ნაწილი პირნათლად შესრულებულია. თუნდაც იგივე საარჩევნო კანონმდებლობასთან დაკავშირებით, ეს მხოლოდ ჩემი სიტყვები არ არის, საერთაშორისო თანამეგობრობის მხრიდან არის პოზიტიური შეფასებები. ასევე, „ნაციონალურ მოძრაობასთან“ დაკავშირებული კრიმინალური ელემენტების განთავისუფლების კითხითაც, ამ თვალსაზრისით შეთანხმების პირობები აბსოლუტურად დაცულია. რაც შეეხება სასამართლო მართლმსაჯულების რეფორმას, ამ თვალსაზრისითაც ხელისუფლებამ განახორციელა მართლმსაჯულების ოთხი ტალღა და შედარება არ არის თუნდაც იმ მემკვიდრეობასთან, რა მემკვიდრეობაც ჩვენ მივიღეთ 2012 წელს. იყო იქ გარკვეული შენიშვნები აღქმებთან დაკავშირებით როგორ სრულდება, თუმცა სამართლებრივი თვალსაზრისით შემიძლია გითხრათ, რომ ყველა რეკომენდაცია არის აბსოლუტურად გათვალისწინებული", - ამბობს ზალკალიანი.
