"ნამდვილად პოზიტიურად ვაფასებთ ჩვენს ურთიერთობას სახელმწიფო ინსპექტორის სამსახურთან. ისინი ჩვენთან მიმართებით არიან გახსნილები, არ გვქონია გამოძიების მასალებზე წვდომის პრობლემა და ამ მიმართულებით მათი გახსნილობა ნამდვილად არის აღსანიშნავი", - ეს განცხადება სახალხო დამცველმა პარლამენტში ანგარიშის წარდგენის შემდეგ, დეპუტატების კითხვებზე პასუხის დროს გააკეთა.
ნინო ლომჯარიას თქმით, ხაზგასასმელია ისიც, რომ სახელმწიფო ინსპექტორის სამსახურის აქვს ინსტიტუციური პრობლემები, რაც მათივე ანგარიშებშიც იკვეთება.
"მათივე ანგარიშებიდან ჩანს, რომ მართლდება ის შიშები, რაც სახალხო დამცველს ჰქონდა იმასთან დაკავშირებით, რომ კანონმდებლობამ სახელმწიფო ინსპექტორის სამსახურს არ მიანიჭა საკმარისი დამოუკიდებლობის გარანტიები. ანუ, მათ აქვთ ინსტიტუციური პრობლემები რაც გამოიხატება იმაში, რომ კანონმდებლობით ისინი არ არიან საკმარისად დისტანცირებული პროკურატურისგან და დღეს მაგალითად დევნის დაწყება არის დამოკიდებული პროკურატურის გადაწყვეტილებაზე. ის, რომ ცალკეული საგამოძიებო მოქმედებების ჩატარებისთვის ასევე პროკურატურის ნებართვა არის საჭირო. ფაქტია, რომ მათივე ანგარიშები ცხადყოფს რომ ეს ინსტიტუციური ბმა - რაც დარჩა პროკურატურასთან მათ დამოუკიდებლობას უშლის ხელს და უქმნის პრობლემებს", - განაცხადა ნინო ლომჯარიამ.
