საქართველოს ჯანდაცვის მინისტრის, ეკატერინე ტიკარაძის განცხადებით, ქვეყანაში მასობრივი ვაქცინაციის პროცესი მე-3 კვარტალში დაიწყება. ამის შესახებ მინისტრმა "რუსთავი 2"-ის ეთერში განაცხადა.
"ეტაპობრივად ვახორციელებთ როგორც ბრიგადების დამატებას, ასევე იმ საჭირო ადგილების დამატებას, რის შემდეგაც ჩვენი მოქალაქეები შეძლებენ თავისუფლად ვაქცინირებას.
მნიშვნელოვანია ის, რომ მასობრივ ვაქცინაციაზე საუბარი ყოველთვის გვქონდა, რომ დაიწყება მესამე კვარტალში. მესამე კვარტალი დადგება და ჩვენ დავიწყებთ მასობრივ ვაქცინაციას, აქედან გამომდინარე არანაირი ცვლილება გეგმაში არ მომხდარა და ვაქცინაციის პროცესს რისკი არ აქვს," - განაცხადა ჯანდაცვის მინისტრმა.
ეკატერინე ტიკარაძის განცხადებით, ვაქცინაციის პროცესთან დაკავშირებით, ჯანდაცვის სამინისტროს მისამართით დიდი ხანია საყვედურები გაისმის, თუმცა იმუნიზაციის პროცესი ვაქცინაციის კალენდრის მიხედვით მიმდინარეობს.
"ჩვენ გვესმის არაერთი საყვედური, რომ ჩვენ რაღაცას ვაგვიანებთ, არ ვაკეთებთ თანმიმდევრულად და ა.შ. საერთაშორისო პარტნიორებთან ერთად, სახელმწიფომ, ჯანდაცვის სამინისტრომ დაავადებათა კონტროლის ცენტრთან ერთად შეიმუშავა ვაქცინაციის კალენდარი, რა ეტაპობრიობით უნდა მომხდარიყო საქართველოში კორონავირუსის პანდემიის წინააღმდეგ ჩვენი მოქალაქეების ვაქცინირება და ჩვენ ამ კალენდრის სრულ თანხვედრაში ვართ და რთული იქნება ჯანდაცვის სამინისტროსთვის საყვედურების მიღება, თუმცა ჩვენ ყოველთვის მზად ვართ, გავაუმჯობესოთ შედეგები,"- აცხადებს ეკატერინე ტიკარაძე.