დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ივლისიდან ოქტომბრის ჩათვლით, საქართველო კორონავირუსის საწინააღმდეგო ვაქცინის დაახლოებით 3 მილიონ 200 000-ზე მეტ დოზას მიიღებს.
"ძალიან მაღალი ალბათობით, გვაქვს დადასტურება, რომ ივლის-აგვისტო-სექტემბერ-ოქტომბერში ქვეყანა მიიღებს დაახლოებით 3 მილიონ 200 000-ზე მეტ დოზა ვაქცინას. ანუ, ჩვენ შეგვეძლება ე.წ. მასობრივი ვაქცინაციის დაწყება.
მე ხშირად გეუბნებოდით, რომ მასობრივ ვაქცინაციას დავიწყებთ მაშინ, როდესაც გარანტირებულად საწყობებში ყველა თვის დასაწყისში გვექნება სულ მცირე ვაქცინის ნახევარი მილიონი დოზა. აქედან გამომდინარე, ჩვენ ახლა ინტენსიურად ვემზადებით, გასულ კვირას მქონდა ვიზიტები რეგიონებში, დაგვრჩა აჭარა, გურია და რაჭა, ამ კვირაში მივდივართ იქაც, რომ ადგილებზე იყოს მეტი მზადყოფნა", – განაცხადა ამირან გამყრელიძემ.
შეგახსენებთ, საქართველო ფარმაცევტულ კომპანია "ფაიზერთან" ვაქცინის 1 მილიონ დოზაზე მოლაპარაკებებს აწარმოებს. დაავადებათა კონტროლის ეროვნული ცენტრის ინფორმაციით, მოლაპარაკებები მიმდინარეობს "ნოვავაქსთან", რომლის ფარგლებშიც ქვეყანა 700 000-მდე დოზას მიიღებს.
გარდა ამისა, საქართველომ კოვაქს პლატფორმისგან დამატებით უნდა მიიღოს ასტრაზენეკას ვაქცინის 40 000 დოზაზე მეტი.
ამასთან, შეერთებული შტატები ვაქცინის გლობალური განაწილების კამპანიის ფარგლებში, საქართველოსთვისაც გამოყოფს ვაქცინის დოზებს.
