ამასთან დაკავშირებით, ჩრდილო ოსეთის რესპუბლიკის სრულუფლებიანმა წარმომადგენელმა რუსეთის პრეზიდენტთან ალექსანდრე ტოტოონოვმა მოძრაობა "ნოვიე ლიუდის" ხელმძღვანელს ალექსანდრე გრიბანოვს სამადლობელი წერილიც კი გაუგზავნა. სწორედ ეს მოძრაობა აპროტესტებდა "მსოფლიოს დიდი უნივერსალური ატლასის" გამოცემას, რომელზეც აფხაზეთი და ცხინვალის რეგიონი საქართველოს ნაწილებად იყო მითითებული.

"მადლობელი ვარ თქვენი და აქციის ყველა მონაწილის მიერ გამოხატული სამოქალაქო პოზიციის გამო. იმისათვის, რომ აქციამ - "წესრიგი რუკებში - წესრიგი თავებში" თავისი შედეგი გამოიღო და უახლოეს მომავალში სამართლიანობა აფხაზეთისა და სამხრეთ ოსეთის მიმართ აღდგენილი იქნება", _ ნათქვამია წერილში.

შეგახსენებთ, რომ უმსხვილესი რუსული გამომცემლობის "ოლმა მედია გრუპი"-ის მიერ სასწავლო წლის დასაწყისისათვის ფართო გაყიდვაში გამოშვებულ იქნა "მსოფლიოს დიდი უნივერსალური ატლასის" დიდი ტირაჟი. ატლასზე რუსეთის მიერ ოკუპირებული საქართველოს რეგიონები აფხაზეთი და ე.წ. სამხრეთ ოსეთი ცალკე სახელმწიფოებად გამოყოფილი არ არის და კვლავ საქართველოს შემადგენლობაშია დაფიქსირებული.

ამით აღშფოთებულმა რუსეთის საერთორეგიონალური ახალგაზრდული საზოგადოებრივი ორგანიზაცია "ნოვიე ლიუდი"-მ 27 ოქტომბერს მოსკოვში ნაციონალური კარტოგრაფიული კორპორაციის შენობის შესასვლელთან საპროტესტო მიტინგი ჩაატარა სახელწოდებით - "ის რისი გაკეთებაც იარაღმა ვერ შეძლო, გეოგრაფიულმა რუკებმა გააკეთეს".

"ოლმა მედია გრუპი"-ი მოსწავლეებსა და მათ მშობლებს სთავაზობს გამოცემას, რომელშიც რუსეთის მიერ აფხაზეთისა და სამხრეთ ოსეთის დამოუკიდებლობის აღიარების ორი წლის შემდეგ ეს ორი სახელმწიფო ცალკე სახელმწიფოებად არ არიან გამოყოფილნი და რუკაზე კვლავ საქართველოს შემადგენლობაში არიან დაფიქსირებულნი. თავად საქართველო კი რუკაზე დსთ-ს წევრთა რიგებშია", _ წერს მოძრაობის პრესსამსახური და აღნიშნულთან დაკავშირებით განცხადებას ავრცელებს.

კორპორაციის შენობასთან მომოტინგეებმა თვალსაჩინოებისათვის რუკებიდან გააკეთეს იარაღი, ზარბაზნები, პისტოლეტები და ავტომატები. მიტინგზე იყო ლოზუნგები - "რასაც ვერ აკეთებს იარაღი - აკეთებს წიგნები და რუკები!", "წესრიგი რუკებზე - წესრიგი თავებში!", "ის რაც დაწერილია - ვერ ამოშლი!", "მოიყვანეთ გეოგრაფიული რუკები მწყობრში!".

ამას გარდა, მათ "ოლმა მედია გრუპი"-ის გენერალურ დირექტორს გადასცეს წერილი, რომელშიც "დაშვებული სერიოზული შეცდომის" გამოსწორებას მოითხოვეს.

"ერთ-ერთა ჩვენმა აქტივისტმა მე ახალი ატლასი მომიტანა, რომელიც ვოლგოგრადში იყიდა. გავხსენი საქართველოს გვერდი და ნანახმა შემზარა - აღმოვაჩინე, რომ დამოუკიდებელი რესპუბლიკები აფხაზეთი და სამხრეთ ოსეთი აქ ჯერაც საქართველოს შემადგენლობაში იმყოფებიან", _ აცხადებდა მოძრაობა "ნოვიე ლიუდის" ლიდერი იგორ გრიბანოვი.