საქართველოში ჩინეთის ელჩი ჩინური ვაქცინით აიცრება. ამის შესახებ ლი იენმა დაავადებათა კონტროლის ცენტრში გამართულ ბრიფინგზე განაცხადა.
"მე აუცილებლად ავიცრები და აუცილებლად ავიცრები ჩინური ვაქცინით", განაცხადა ელჩმა, რომელიც დღეს ჩინური ვაქცინის Sinopharm-ის ვაქცინის პრეზენტაციაზე იმყოფებოდა.
მისი თქმით, ჩინეთის მიერ საზღვარგარეთ აკრედიტირებული დიპლომატიური კორპუსის წარმომადგენლები არსებული რეგულაციების მიხედვით აიცრებიან.
„ჩვენთვის ძალიან სასიამოვნო და გასახარი იყო ის ფაქტი, რომ გასულ კვირას საქართველოს საგარეო საქმეთა სამინისტროსგან მივიღეთ შეტყობინება, რომ საქართველოში აკრედიტირებულ დიპლომატებსაც გვექნება შესაძლებლობა, სურვილისამებრ ჩავერთოთ ვაქცინაციის პროგრამაში. ამიტომ, მინდა ძალიან დიდი მადლობა გადავუხადო საქართველოს საგარეო საქმეთა და ჯანდაცვის სამინისტროებს ჩვენი დიპლომატების მიმართ გამოჩენილი გულისხმიერებისთვის. ჩვენ აუცილებლად შევინარჩუნებთ ამ თემაზე კომუნიკაციას სამინისტროსთან“, - განაცხადა ელჩმა.