აფხაზეთისა და ცხინვალის რეგიონში მცხოვრებ ექიმებსა და 65 წელს ზემოთ ადამიანებს აცრის შესაძლებლობა ექნებათ, - ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა ბრიფინგზე განაცხადა.
ახვლედიანის თქმით, ისინი ვაქცინის გაკეთებას საქართველოს ხელისუფლების მიერ კონტროლირებად ტერიტორიაზე შეძლებენ.
"საქართველოში მიმდინარე კოვიდსაწინააღმდეგო იმუნიზაციის პროგრამაში ჩართვის საშუალება ეძლევათ საქართველოს აფხაზეთისა და ცხინვალის რეგიონში მცხოვრებ სამედიცინო სფეროსა და შესაბამისი ასაკობრივი ჯგუფის წარმომადგენელ პირებს, რომლებსაც შეეძლებათ, ვაქცინაცია ჩაიტარონ საქართველოს ცენტრალური ხელისუფლების კონტროლირებად ტერიტორიაზე", - თქვა ახვლედიანმა.
საქართველოს ჯანდაცვის მინისტრის ეკატერინე ტიკარაძის განცხადებით, ოკუპირებულ რეგიონებში მცხოვრები პირებისთვის ვაქცინაციისთვის რეგისტრაცია არ იქნება სავალდებულო.
"მივიღეთ მნიშვნელოვანი გადაწყვეტილება ჩვენი მოქალაქეებისთვის, რომლებიც ცხოვრობენ ოკუპირებულ ტერიტორიაზე, მათთვის გაიხსნება ფანჯრები, სადაც შეძლებენ ვაქცინაციის ჩატარებას. მათთვის რეგისტრაციის მოდული არ იქნება სავალდებულო, რადგან ვთვლით, რომ მაქსიმალურად გამარტივებული უნდა იყოს ყველა პროცედურა, რომელსაც ისინი გაივლიან. დამატებითი სქემა იქნება იგივე, ყველა ექიმი და რისკჯგუფი, რომელიც განსაზღვრულია კოვიდვაქცინაციის საბჭოს მხრიდან, მათი ვაქცინაციაც იგივე სქემით წარიმართება. უშუალოდ სამედიცინო დაწესებულებაში შესაბამისი დოკუმენტის წარდგენის საფუძველზე და სურვილის შემთხვევაში, ისინი გაივლიან რეგისტრაციას. ჩვენ ვიცით დაახლოებით იმ სამედიცინო პერსონალის რაოდენობა, რომელიც ოკუპირებულ ტერიტორიაზე იმყოფება. შესაბამისად, რა თქმა უნდა, მათთვის გამოყოფილი გვაქვს საჭირო დოზა, დაახლოებით 500 დოზამდე იქნება სამედიცინო პერსონალისთვის. ამასთან, პენსიონრების კუთხითაც მკაფიოა საბჭოს ხედვა. იცით, რომ ისინი სარგებლობენ საქართველოს ტერიტორიაზე არსებული საპენსიო შეღავათებით და მათთან მიმართებაში აქვს საბჭოს ხედვა, თუ რა დოზების მარაგი იქნება გამოყოფილი. თუმცა, ვინაიდან არ გვაქვს რეგისტრაციის ვალდებულება ჩადებული ამ პროცედურაში და მაქსიმალურად ვცდილობთ, ხელი შევუწყოთ ოკუპირებულ ტერიტორიაზე მცხოვრები ჩვენი მოქალაქეების ვაქცინაციას, დოზების შეზღუდვას არ მივმართავთ. ისინი არ იქნებიან შეზღუდულები ვაქცინის არჩევაში", - განაცხადა ეკატერინე ტიკარაძემ.
