რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა აცხადებს, რომ მოსკოვი უპასუხოდ არ დატოვებს ვაშინგტონის ახალ სანქციებს.
ზახაროვას განცხადებით, სანქციები არის რუსეთის შიდა საქმეებში ღია ჩარევის გაგრძელების საბაბი და რუსეთისგან მტრის ხატის შექმნის მცდელობა შეერთებულ შტატებში არსებული შიდა პრობლემების ფონზე.
"ჩვენ რეაგირებას მოვახდენთ ორმხრივობის პრინციპის საფუძველზე, არ არის აუცილებელი ეს სიმეტრიული რეაგირება იყოს", - თქვა ზახაროვამ.
მისივე განცხადებით, თეთრი სახლი პოლიტიკა ლოგიკას მოკლებულია და კიდევ უფრო აუარესებს ორ ქვეყანას შორის ურთიერთობებს.
"ჩვენს კოლეგებს მოვუწოდებთ, ცეცხლს ნუ ეთამაშებიან", - დასძინა ზახაროვამ.
შეგახსენებთ, გუშინ შეერთებულმა შტატებმა და ევროკავშირმა რუსი მაღალჩინოსნების წინააღდეგ სანქციების დაწესების შესახებ განაცხადეს.
შეერთებული შტატების ხაზინის დეპარტამენტმა პერსონალური სანქციები დაუწესა იმ რუს მაღალჩინოსნებს, რომელთაც კრემლის მწვავე კრიტიკოსის, ალექსეი ნავალნის მოწამვლასა და პატიმრობის შეფარდებასთან აქვთ კავშირი.
რუსეთის ფედერაციის პრეზიდენტის ადმინისტრაციის ხელმძღვანელის მოადგილეს სერგეი კირიენკოს;
ფედერალური უსაფრთხოების საბჭოს დირექტორს ალექსანდრ ბორტნიკოვს;
თავდაცვის მინისტრის მოადგილეებს ალექსეი კრივორუჩკოსა და პაველ პოპოვს;
რუსეთის ფედერაციის პენიტენციური სამსახურის დირექტორს ალექსანდრ კალაშნიკოვს;
რუსეთის გენერალურ პროკურორს იგორ კრასნოვს;
რუსეთის პრეზიდენტის საშინაო პოლიტიკის სამმართველოს უფროსს ანდრეი იარინს.
სანქცირებულთა სიაში მყოფი პირების აქტივები აშშ-ში გაიყინება, შეერთებული შტატების მოქალაქეებს კი მათთან საქმიანობის დაწყება და ურთიერთობა აეკრძალებათ.
სანქცირებულთა სიაში მოხვდა რუსეთის სამი სამეცნიერო-კვლევითი ინსტიტუტი, რუსეთის თავდაცვის სამინისტროს 27-ე სამეცნიერო ცენტრი, რუსეთის თავდაცვის სამინისტროს 33-ე კვლევითი ცენტრი და ორგანული ქიმიისა და ტექნოლოგიების კვლევითი ცენტრი.
რუსი მაღალჩინოსნების წინააღმდეგ, პერსონალური სანქციები დააწესა ევროკავშირმა.
ევროკავშირის სანქციები დაუწესდათ:
რუსეთის საგამოძიებო კომიტეტის ხელმძღვანელს ალექსანდრ ბასტრიკინს;
რუსეთის გვარდიის დირექტორს ვიქტორ ზოლოტოვს;
გენერალურ პროკურორს იგორ კრასნოვს;
სასჯელაღსრულების ფედერალური სამსახურის დირექტორს ალექსანდრ კალაშნიკოვს.
სანქცირებულ პირებს აეკრძალებათ ევროკავშირის ტერიტორიაზე შესვლა და გაიყინება მათი აქტივები.