გერმანიის კანცლერი ანგელა მერკელი აცხადებს, რომ იგი განრისხებული და ამავდროულად დამწუხრებულია ვაშინგტონში, კაპიტოლიუმის შენობაზე განხორციელებული თავდასხმის გამო.
მერკელმა ასევე მწუხარება გამოხატა იმის შესახებ, რომ დონალდ ტრამპი ჯერ კიდევ არ აღიარებს არჩევნებში დამარცხებას.
"ღრმა მწუხარებას გამოვხატავ, რომ პრეზიდენტი ტრამპი ამ დრომდე არ აღიარებს არჩევნებში დამარცხებას“, - თქვა ანგელა მერკელმა.
"არჩევნების შედეგებთან დაკავშირებით ეჭვები გაღრმავდა და ამან შექმნა ატმოსფერო, რამაც შესაძლებელი გახადა წუხანდელი მოვლენები", - დასძინა მერკელმა.
გერმანიის კანცლერი მიესალმა შეერთებული შტატების კონგრესის მიერ ჯო ბაიდენის გამარჯვების დადასტურებას და განაცხადა, რომ ბაიდენის ინაუგურაცია გახსნის ახალ თავს ამერიკის დემოკრატიის ისტორიაში.
"ეს იმას ნიშნავს, რომ ამერიკაში დემოკრატიამ გაიმარჯვა, ეს არის ის, რასაც ჩვენ მოველოდით ამერიკის შეერთებული შტატებისგან", - აღნიშნა გერმანიის კანცლერმა.