2020 წლის II კვარტლის წინასწარი მონაცემებით, აჭარაში, პირდაპირი უცხოური ინვესტიციების მოცულობა 51.9 მლნ აშშ დოლარს შეადგენს. წინა წლის ანალოგიურ მაჩვენებელთან შედარებით აღნიშნული ინვესტიცია 35%-ით გაიზარდა. მიმდინარე პერიოდში მაღალი საინვესტიციო აქტივობით გამოირჩევა მშენებლობის (28.9 მლნ აშშ დოლარი) და ენერგეტიკის (15.5 მლნ აშშ დოლარი) სექტორები.
2020 წლის პირველი ნახევრის მდგომარეობით, აჭარაში პირდაპირი უცხოური ინვესტიცია 73,2 მლნ აშშ დოლარს შეადგენს, წინა წელთან შედარებით ზრდა-15 %.
საქართველოს სტატისტიკის ეროვნული სამსახურის ანგარიშში საუბარია ინვესტიციების რეგიონების მიხედვით განაწილებაზეც, სადაც ნათლად იკვეთება, რომ FDI-ს ძირითადი ნაწილი თბილისის შემდეგ, აჭარაში კონცენტრირდება.
მნიშვნელოვანია, რომ აჭარაში მეორე კვარტლის ინვესტიციის უდიდესი ნაწილი სააქციო კაპიტალისა და რეინვესტიციისგან ფორმირდება. კერძოდ, მთლიან ინვესტიციებში სააქციო კაპიტალში ინვესტირების წილი 90%, ხოლო რეინვესტირების მაჩვენებელი 7%-ია.
2020 წლის II კვარტლის მონაცემებით, სააქციო კაპიტალი 46,5 მლნ დოლარს შეადგენს. ეს მაჩვენებლი პირდაპირი ინდიკატორია, იმის, რომ აჭარაში ბიზნესი თავისი საქმიანობის გაფართოებას თავისივე ფინანსური რესურსით და კაპიტალით ახორციელებს.
აჭარაში ჯანსაღ საინვესტიციო პროცესებზე, ასევე რეინვესტირების გაზრდილი მაჩვენებლი მიუთითებს. გლობალური გამოწვევების ფონზე, შექმნილი ეკონომიკური სირთულეების მიუხედავად, აჭარაში არსებული ბიზნესი არა მხოლოდ ინარჩუნებს პოზიციას ბაზარზე, არამედ ახორციელებს რეინვესტირებას და აფართოვებს თავის საქმიანობას.
აღსანიშნავია, რომ ტრადიციული ქვეყნების გარდა ინვესტიციის დაახლოებით 35% ნიდერლანდები-ავსტრია-შვეიცარიაზე მოდის.
„აჭარაში განხორციელებული ეფექტური საინვესტიციო პოლიტიკის შედეგად, ჩვენ გვაქვს ინვესტიციების მზარდი დინამიკა. განსაკუთრებით მნიშვნელოვანია უცხოური ინვესტიციების ასეთი მაღალი მაჩვენებელი, იმ ეკონომიკური გამოწვევების ფონზე, რომლშიც ჩვენი ქვეყანა და მთელი მსოფლიო იმყოფება. ეს კიდევ ერთხელ მიუთითებს, რომ უცხოელი პარტნიორები ენდობიან ჩვენ ჯანსაღ საინვესტიციო გარემოს და მზად არიან თავიანთი კაპიტალი დააბანდონ.
აჭარის მთავრობამ აქტიური პრივატიზების პროცესი მიმდინარე წლის გაზაფხულზე დაიწყო. გარდა ამისა, საინვესტიციო გარემოს ხელშეწყობისა და ეკონომიკის სტიმულირების მიზნით, ახალი კორონავირუსის გავრცელების სხვადასხვა ეტაპზე, არაერთი ინიციატივა განვახორციელეთ. მომზადდა ახალი პროექტი და მთავრობის განკარგულებაში ცვლილებები განხორციელდა. კერძოდ, ინვესტორებს ნაკისრი ვალდებულების შესასრულებლად, დამატებითი 12-თვიანის საშეღავათო ვადა განესაზღვრათ. განკარგულებამ მნიშვნელოვნად შეუწყო ხელი ბიზნეს სუბიექტებს, მეტ-ნაკლებად უმტკივნეულოდ მოეხდინათ რთულ ეკონომიკურ სიტუაციასთან გამკლავება“-აჭარის ფინანსთა და ეკონომიკის მინისტრი ჯაბა ფუტკარაძე.
