ნამახვანი ჰესების კასკადის პროექტის განმახორციელებელმა კომპანიამ ENKA Renewables-მა (შპს „ენკა რინიუებლზ“) 2020 წლის მეორე კვარტალში 12 მილიონი ლარის ოდენობის პირდაპირი ინვესტიცია განახორციელა.

ENKA Renewables-ის მიერ საქართველოში ჩადებული FDI-ის მოცულობით, BM.ge მას შემდეგ დაინტერესდა, რაც კომპანია TOP-20 უცხოელ ინვესტორს შორის მოხვდა.

ინვესტორ კომპანიაში აცხადებენ, წყალტუბოს მუნიციპალიტეტში მოსამზადებელი სამუშაოები უკვე დაწყებულია. ამჟამად პროექტზე 300-მდე ადამიანი მუშაობს.

ნამახვანის პროექტზე, ჯამში, 2000 ადამიანამდე დასაქმდება, საიდანაც 80% საქართველოს მოქალაქე იქნება.

როგორც ცნობილია, ნამახვანის ჰესების კასკადის პროექტი 800 მილიონ აშშ დოლარამდე მოცულობის პირდაპირი უცხოური ინვესტიციით ხორციელდება. პროექტის ძირითადი ინვესტორი და 90%-იანი წილის მფლობელი 63-წლიანი ისტორიის მქონე თურქული კორპორაცია ENKA-ა (ENKA İnşaat ve Sanayi A.Ş.). კომპანია ძირითადად ინჟინერიის, მშენებლობისა და ენერგეტიკის დარგებში ოპერირებს მსოფლიოს 64 ქვეყანაში, სადაც ამჟამად 20,000-ზე მეტ ადამიანს ასაქმებს.

430-მეგავატიანი კასკადის წლიური გამომუშავება 1,500 გგვთ.სთ-ს მიაღწევს, რაც 2019 წელს საქართველოს მთლიანი მოხმარების 11.7%-ს შეადგენს.