2021 წელს ყველაფერს გავაკეთებთ, რომ ეკონომიკური ზრდის პოზიტიურ დინამიკას დავუბრუნდეთ. ამის შესახებ საქართველოს ეკონომიკისა და მდგრადი განვითარების მინისტრმა, ნათია თურნავამ საკოორდინაციო საბჭოს სხდომის დასრულების შემდეგ, მთავრობის ადმინისტრაციაში გამართულ ბრიფინზე განაცხადა.
ამ განცხადებით, ნათია თურნავა სტატისტიკის ეროვნული სამსახურის მიერ გავრცელებულ ინფორმაციას გამოეხმაურა, რომლის მიხედვით მაისში საქართველოს ეკონომიკა 13.5 პროცენტით შემცირდა.
"ზოგადად, ეს სტატისტიკა იყო მოსალოდნელი. პირველ რიგში, კიდევ ვამბობ, რომ მთავარი არის, რომ აპრილი, მაისი ჩვენ მაინც რეჟიმში ვიმყოფებოდით და სრულიად შეგნებულად გვქონდა შეჩერებული ბიზნესაქტივობა, ადამიანების მობილობა, რამაც მოგვცა შესაძლებლობა, გადავრჩენილიყავით პრაქტიკულად და არ გაგვემეორებინა ის ნეგატიური ტენდენციები, რაც ბევრ სხვა სახელმწიფოში მოხდა სამწუხაროდ და შეგვენარჩუნებინა დადებითი, კეთილსაიმედო ეპიდემიოლოგიური ვითარება.
რა თქმა უნდა, ველოდებით, რომ ვითარება კვლავ იქნება ნეგატიური დინამიკა, ეს ყველამ კარგად ვიცით. სხვადასხვა საერთაშორისო ორგანიზაციის ვარაუდით, წლის ბოლომდე მინუს ოთხი, მინუს ხუთი პროცენტია მოსალოდნელი, თუმცა 2021 წელს ყველაფერს გავაკეთებთ იმისთვის, რომ პოზიტიურ დინამიკას დავუბრუნდეთ. ხედავთ, რომ მაისში უკეთესი დინამიკა იყო, ვიდრე აპრილში, სწორედ იმის გამო, რომ ბოლო დეკადაში გახსნილი იყო ბიზნეს საქმიანობა", - განაცხადა ნათია თურნავამ.