ალბანეთის დედაქალაქ ტირანაში პრემიერ-მინისტრ ედი რამას გადადგომის მოთხოვნით სტუდენტების საპროტესტო გამოსვლები უკვე ათი დღეა გრძელდება. მედიის ცნობით, 22 ოქტომბერს პარლამენტის სხდომის მიმდინარეობისას შენობის წინ რამდენიმე ასეული დემონსტრანტი შეიკრიბა. ამავე დღეს პარლამენტში ოპოზიციისა და მმართველი პარტიის დეპუტატებს შორის დაპირისპირებაც მოხდა.
აქციის მონაწილეები ედი რამას კორუფციაში ადანაშაულებენ და მთავრობის გადადგომას მოითხოვენ. სტუდენტების პროტესტის მიზეზებს შორისაა უნივერსიტეტებში არსებული პირობები, სწავლის მაღალი საფასური, განათლების სფეროს არასაკმარისი დაფინანსება და კორუფციის ბრალდებები. გამოსვლები თავდაპირველად მშვიდობიანი იყო, თუმცა მოგვიანებით დემონსტრანტებსა და პოლიციას შორის შეტაკებები დაიწყო. სამართალდამცველებმა აქციის მონაწილეების წინააღმდეგ ცრემლსადენი გაზი და წყლის ჭავლი გამოიყენეს.
Reuters-ის ცნობით, პროტესტის ერთ-ერთი მიზეზი ასევე გახდა ალბანეთის სამხრეთ სანაპიროზე ძვირადღირებული საკურორტო კომპლექსის მშენებლობის გეგმა, რომელიც აშშ-ის პრეზიდენტ დონალდ ტრამპის სიძის, ჯარედ კუშნერის კომპანიასთან არის დაკავშირებული. პროექტს ადგილობრივების პროტესტი მოჰყვა.
რამამ გადადგომის მოთხოვნა უარყო და განაცხადა, რომ ხელისუფლება არჩევნების გზით უნდა შეიცვალოს. მან ასევე დაგმო საზოგადოებრივი ქონების დაზიანება და აღნიშნა, რომ სტუდენტების ლეგიტიმური მოთხოვნები ძალადობას არ უნდა უკავშირდებოდეს.
