10-მა ამერიკელმა სენატორმა, რესპუბლიკური და დემოკრატიული პარტიებიდან, აშშ-ის თავდაცვის მდივან პიტ ჰეგსეთსა და სახელმწიფო მდივან მარკო რუბიოს მოუწოდეს, ბალტიის უსაფრთხოების ინიციატივისთვის უკვე დამტკიცებული დაფინანსება მიმდინარე წლის ბოლომდე გამოყონ.
ამის შესახებ ინფორმაციას ლატვიური საზოგადოებრივი მაუწყებელი LSM ავრცელებს.
სენატორები აცხადებენ, რომ აუცილებელია დაფინანსების ფარგლებში გათვალისწინებული ყველა ვალდებულებისა და პროგრამის დროულად შესრულება, განსაკუთრებით რუსეთის მიერ „წინა ხაზზე მყოფი მოკავშირეების“ წინააღმდეგ აგრესიის გაძლიერების ფონზე.
„ბოლო დროს საჰაერო სივრცის დარღვევების, ე.წ. რუხი ზონის ტაქტიკის გამოყენებისა და ბალტიის ქვეყნების მიმართ ბირთვული მუქარის გაძლიერების გათვალისწინებით, ბალტიის უსაფრთხოების ინიციატივის ფარგლებში დახმარების დაჩქარება პრიორიტეტი უნდა გახდეს. მოვუწოდებთ, ეს თანხები კალენდარული წლის ბოლომდე გამოიყოს და შესაბამისი გეგმების შესახებ ინფორმაცია არაუგვიანეს 2026 წლის 19 ნოემბრისა მოგვაწოდოთ“, - ნათქვამია წერილში.
სენატორები დადებითად აფასებენ აშშ-ის თავდაცვის დეპარტამენტის მიერ 2026 წლის 29 მაისს წარდგენილ გეგმას, რომელიც ბალტიის უსაფრთხოების ინიციატივისთვის გამოყოფილი თანხების გამოყენებას ითვალისწინებს. გეგმა მოიცავს ინვესტიციებს ინტეგრირებული თავდაცვის, საზღვაო უსაფრთხოებისა და სხვა მიმართულებებით.
ბალტიის უსაფრთხოების ინიციატივა აშშ-ის 2026 საფინანსო წლის ეროვნული თავდაცვის უფლებამოსილების შესახებ კანონით არის განსაზღვრული, ხოლო მისთვის თანხები თავდაცვის დეპარტამენტის ბიუჯეტის შესახებ ცალკე კანონით გამოიყო. აშშ-ის კონგრესმა ინიციატივისთვის 200 მილიონი დოლარი დაამტკიცა, რომელიც ლატვიის, ლიეტუვისა და ესტონეთის თავდაცვითი შესაძლებლობების გაძლიერებას, მათ შორის საჰაერო თავდაცვის, საზღვაო უსაფრთხოებისა და კიბერუსაფრთხოების განვითარებას უნდა მოხმარდეს.
მანამდე ლიეტუვის პრემიერ-მინისტრმა, მინდაუგას სინკიავიჩიუსმა განაცხადა, რომ რუსეთი ნატო-ს კოლექტიური თავდაცვის შესაძლებლობების საზღვრებს ცდის. მისი თქმით, მოსკოვი ისეთ თავდასხმებს მიმართავს, რომლებიც ალიანსს ჩრდილოატლანტიკური ხელშეკრულების მე-5 მუხლის ამოქმედების საფუძველს არ აძლევს.
ამასთან, ლიეტუვამ ახალი ამერიკული რადარების განთავსებაც დაიწყო, რომლებიც მონაცემებს ნატო-ს სისტემას გადასცემენ.
