აშშ-ის პრეზიდენტ დონალდ ტრამპის ადმინისტრაციაში ერთიანი პოზიცია არ აქვთ იმის შესახებ, თუ რატომ შეეზღუდა უკრაინას წვდომა Starshield ის თანამგზავრულ სისტემაზე და ურთიერთგამომრიცხავ განცხადებებს აკეთებენ. თეთრი სახლის წარმომადგენლები პასუხისმგებლობას ერთმანეთს და ილონ მასკის კომპანია SpaceX-ს აკისრებენ, უკრაინას კი დაწესებული შეზღუდვების შესახებ დღემდე მკაფიო განმარტება არ მიუღია. ამის შესახებ Associated Press წერს.
მიუხედავად იმისა, რომ ხუთშაბათს ტრამპმა განაცხადა, რომ სერვისი კვლავ სრული სიჩქარით მუშაობს, ერთ-ერთი ევროპული ქვეყნის მაღალჩინოსანმა, რომელიც უშუალოდ უკრაინაში არსებულ ვითარებას იცნობს, გამოცემას განუცხადა, რომ Starshield-ის მუშაობაში არაფერი შეცვლილა - სიჩქარის შეზღუდვა კვლავ საათში დაახლოებით 160 კილომეტრს შეადგენს.
მისივე თქმით, უკრაინას ოფიციალური და მკაფიო განმარტება არ მიუღია იმის შესახებ, თუ ვინ გასცა შეზღუდვების დაწესების ბრძანება და რა მიზეზით.
გამოცემის ცნობით, უკვე ერთი კვირაა, პასუხგაუცემელია კითხვა, ვინ გასცა ილონ მასკის მიერ შექმნილი თანამგზავრული ინტერნეტსისტემის მუშაობის შეზღუდვის ბრძანება. უკრაინა ამ სისტემას უკვე რამდენიმე წელია რუსეთის თავდასხმების მოსაგერიებლად იყენებს.
ხუთშაბათს ტრამპი კვლავ ამტკიცებდა, რომ ასეთი გადაწყვეტილება მას არ მიუღია. ამასთან, აშშ-ის ვიცე-პრეზიდენტმა ჯეი დი ვენსმა მიანიშნა, რომ თეთრი სახლი მასკთან კოორდინირებულად მოქმედებდა, ხოლო სახელმწიფო მდივანმა მარკო რუბიომ და თავდაცვის მდივანმა პიტ ჰეგსეთმა უარყვეს, რომ ადმინისტრაცია შეზღუდვების დაწესებასთან რაიმე კავშირში იყო.
მანამდე ტრამპმა განაცხადა, რომ მასკმა უკრაინას Starlink-ზე წვდომა აღუდგინა. ამასთან, მან კომენტარი არ გააკეთა გავრცელებულ ინფორმაციაზე, რომლის თანახმადაც, მან მასკს დაურეკა და უკრაინაში ტერმინალების მუშაობის სიჩქარეზე დაწესებული შეზღუდვების მოხსნა სთხოვა.
„ამაზე საუბარი არ მინდა, მაგრამ ვიცი, რომ ეს ძალიან საინტერესო სიტუაცია იყო. ამიტომ არ მინდა არც ერთი მიმართულებით კომენტარის გაკეთება. მე და ილონს ძალიან კარგი ურთიერთობა გვაქვს... ვფიქრობ, მთავარი ისაა, რომ მან ყველაფერი აღადგინა“, - განაცხადა თეთრი სახლის ხელმძღვანელმა.
ასევე ცნობილი გახდა, რომ დემოკრატმა სენატორმა რიჩარდ ბლუმენტალმა Starlink-ზე უკრაინის წვდომის დაკარგვის საკითხზე გამოძიება დაიწყო. ის აპირებს გაარკვიოს, გადაწყვეტილება მომსახურების პირობების შეცვლის შესახებ თეთრი სახლის, პენტაგონის თუ უშუალოდ კომპანია SpaceX-ის მითითებით მიიღეს.
„ეს ინციდენტი აქტუალურ კითხვებს აჩენს იმის შესახებ, თუ ვის აქვს ამ სისტემების მუშაობის პარამეტრების შეცვლის ტექნიკური და სამართლებრივი უფლებამოსილება“,- აღნიშნა სენატორმა.
