აქტიურად ჩავერთვებით საგამოძიებო და საპროკურორო უფლებამოსილებების გამიჯვნის რეფორმის პროცესში, რაც ვფიქრობთ, რომ დაჩქარებას საჭიროებს. განაცხადა სახელმწიფო ინსპექტორმა ლონდა თოლორაიამ პარლამენტში სამსახურის 2019 წლის საქმიანობის ანგარიშის წარდგენისას.
სახელმწიფო ინსპექტორმა საქართველოს პარლამენტში ანგარიშის წარდგენის დროს, ყურადღება სამსახურის ახალი ფუნქციის საქმიანობაზე გაამახვილა.
"არსებული კანონმდებლობა გამომძიებელს არ აძლევს საგამოძიებო მოქმედებების დამოუკიდებლად ჩატარების შესაძლებლობას. კერძოდ, გამომძიებელს კანონით არ აქვს მინიჭებული ისეთი უმნიშვნელოვანესი საგამოძიებო მოქმედებების ჩასატარებლად სასამართლოდან ნებართვის ასაღებად მიმართვის უფლება, როგორიც არის - ჩხრეკა, ამოღება, დათვალიერება, ვიდეოჩანაწერებისა და დოკუმენტების გამოთხოვა, ოპერატიულ-სამძებრო ღონისძიებების განხორციელება. უფრო მეტიც, გამომძიებელს არ აქვს გადაუდებლად მაგალითად, ვიდეოჩანაწერების გამოთხოვის უფლება, მაშინ როცა თითოეული წუთი შეიძლება იყოს გადამწყვეტი. ჩვენ აქტიურად ჩავერთვებით საგამოძიებო და საპროკურორო უფლებამოსილებების გამიჯვნის რეფორმის პროცესში, რაც ვფიქრობთ, რომ დაჩქარებას საჭიროებს", - განაცხადა თოლორაიამ.
დღეს პარლამენტის იურიდიულ საკითხთა კომიტეტის წევრები, სახელმწიფო ინსპექტორის ანგარიშს უსმენენ.
