ზუგდიდში ნარკოდანაშაულისთვის ბრალდებულ ბერთან საპროცესო შეთანხმება გაფორმდა. საბოლოო გადაწყვეტილებით, გიგა ქავთარაძეს სასჯელის სახედ და ზომად 8 წლით თავისუფლების აღკვეთა მიესაჯა, რომელთაგან 5 წელს პენიტენციურ დაწესებულებაში გაატარებს, 3 წელი კი პირობითი მსჯავრია. დაკავებულის ადვოკატის ჯიტა გულუას ინფორმაციით, მას ჯარიმაც დაეკისრა 5 000 ლარის ოდენობით.
რაც შეეხება ამავე საქმეში ბრალდებულ კიდევ ერთ პირს, ის ციხეში 6 თვეს გაატარებს, 3 წელი კი პირობითი მსჯავრის ქვეშ იქნება. გარდა ამისა, მალანიას 2 000 ლარის გადახდა მოუწევს.
გასული წლის დეკემბერში ნარკოდანაშაულისთვის მოქალაქე რომან მალანია და მამა სიმონი (გიგა ქავთარაძე) დააკავეს. მომხდარზე გამოძიება სს კოდექსის 260-ე მუხლით მიმდინარეობდა, რაც ნარკოტიკული საშუალების უკანონო დამზადებას, წარმოებას, შეძენას, შენახვას, გადაზიდვა, გადაგზავნას ან გასაღებას გულისხმობს.
