აჭარის საკანონმდებლო ორგანოში ახალი კანონპროექტის ინიცირება განხორციელდა. აჭარის ფინანსთა და ეკონომიკის მინისტრის მოადგილემ თინა ზოიძემ აჭარის უმაღლეს საბჭოს კანონის პროექტი წარუდგინა.
ახალი ინიციატივა "აჭარის ავტონომიური რესპუბლიკის ქონების მართვისა და განკარგვის შესახებ“ კანონში ცვლილებების განხორციელებას ითვალისწინებს.
აჭარის მთავრობის თავმჯდომარის თორნიკე რიჟვაძის მიერ ინიცირებული პროექტი, აჭარის ავტონომიური რესპუბლიკის კანონის ნორმების უფრო სრულფასოვნად გამოყენებას და აღსრულებას უზრუნველყოფს.
აჭარის უმაღლესი საბჭოს საკონსტიტუციო, იურიდიულ და საპროცედურო საკითხთა კომიტეტის სხდომაზე მინისტრის მოდგილემ თინა ზოიძემ კანონის პროექტის დეტალებზე ისაუბრა.
წარდგენილი კანონპროექტით ცვლილება სხვადასხვა მუხლში განხორციელდება.
ახალი ინიციატივის მიხედვით, აჭარის მთავრობის მიერ მიღებული საინვესტიციო განკარგულების წესი, უკვე საკანონმდებლო ჩანაწერით გამყარდება, რომლის საფუძველზეც მთავრობა სისტემური ხასიათის შესაბამის ნორმატიულ აქტს გამოსცემს. ცვლილება აჭარაში საინვესტიციო გარემოს კიდევ უფრო გაჯანსაღებას შეუწყობს ხელს.
არსებულ ჩანაწერს სხვა ცვლილებებთან ერთად ახალი დებულება ემატება, რომელიც აჭარის ფინანსთა და ეკონომიკის სამინისტროს ანიჭებს უფლებამოსილებას, ქონების მყიდველის მიერ ნაკისრი ვალდებულებების არანაკლებ 50%-ის შესრულების დადგენილი წესით დადასტურების შემთხვევაში, მიიღოს გადაწყვეტილება ქონების მყიდველის მიერ წარმოდგენილი უპირობო და გამოუხმობი საბანკო გარანტიის შესაბამისი ოდენობით შემცირების თაობაზე.
