Covid-19-ის პანდემიით გამოწვეული ელექტროენერგიის მოხმარების შემცირება მოსალოდნელია სექტემბრამდე გაგრძელდეს. მთავრობა 2020 წლის ჯამური მოხმარების 0.8%-იან კლებას პროგნოზირებს.
Galt & Taggart-ის მონაცემებით, მარტში ელექტროენერგიის მოხმარება წლიურად შემცირდა 7.8%–ით, პანდემიის შედეგად გამოწვეული შეზღუდვების გამო. Covid-19-ის გავლენა ელექტროენერგიის მოხმარებაზე უფრო მკვეთრი იქნება 2020 წლის აპრილში, როდესაც ყველაზე მკაცრი შეზღუდვები იყო. თუმცა, ეკონომიკისა და მდგრადი განვითარების სამინისტროს განახლებული წლიური პროგნოზის საფუძველზე (მიღებულია 2020 წლის 24 აპრილს), აპრილში მოხმარების წლიურად 5.9%-ით კლებაა ნავარაუდები, რაც უფრო ნაკლებია ვიდრე მარტის ფაქტიური მაჩვენებელი. იგივე დოკუმენტი პროგნოზირებს ელექტროენერგიის მოხმარების უარყოფით ზრდას სექტემბრის ჩათვლით, რის შედეგადაც 2020 წლის ჯამური მოხმარება შემცირდება 12.7ტვტ.სთ-მდე (-0.8% წ/წ).
"კორონავირუსის ნეგატიური გავლენის შემსუბუქების მიზნით, მთავრობა მოსახლეობის ნაწილს კომუნალურ გადასახადს 3 თვის განმავლობაში დაუფარავს. შეღავათს მიიღებენ ის აბონენტები, რომელთა მოხმარებაც ნაკლებია 200კვტ.სთ-ზე ელექტროენერგიის შემთხვევაში და 200მ3-ზე ბუნებრივი გაზის შემთხვევაში. ეს მოხმარება დაახლოებით შეესაბამება თვიურად 37 ლარის გადასახადს ელექტროენერგიის შემთხვევაში და 100 ლარის მოხმარებას ბუნებრივი აირისთვის. მთავრობამ მსურველებს დოტაციაზე უარის თქმის შესაძლებლობა მისცა. მარტში ამ შეღავათზე უარი 3,534-მა აბონენტმა განაცხადა", - აღნიშნულია განცხადებაში.
