2011 წლისთვის შიდა ქართლის საოკუპაციო ზოლთან არსებულ სოფლებში წყლის პრობლემები აღარ იქნება. ამის შესახებ პრეზიდენტის, სოფლის მეურნეობის მინისტრის, გარემოს დაცვის მინისტრისა და შიდა ქართლის გუბერნატორის შეხვედრაზე გახდა ცნობილი.
შიდა ქართლის გუბერნატორ ზურაბ არსოშვილის განცხადებით, საოკუპაციო ზოლთან არსებული სოფლების მოსახლეობამ სარწავი წყლის პრობლემების არსებობის გამო, მიწათმოქმედება, ფაქტობრივად, ვერ შეძლო.
სალთვისის არხის მიმართულებაზე 7125 ჰექტარია მოსარწყავი, ხოლო თეზიოგამის საირიგაციო არხზე 3000 ჰექტარია დარჩენილი.
სოფლის მეურნეობის მინისტრ ბაკურ კვეზერელის განმარტებით, ამ სოფლებში 2011 წლიდან წყლის პრობლემა აღარ იქნება. წყლის მიწოდებას განახორციელებს 2009 წელს გორის რაიონში აშენებული კაშხალი. მოგვარებული იქნება გორისა და ქარელის რაიონების წყლის პრობლემები.
