„ჩვენ აქტიურად ვმუშაობთ ახალი ინვესტიციებისა და ინვესტორების მოზიდვაზე. ჩვენთვის სტრატეგიულად მნიშვნელოვანია მოვიზიდოთ ინვესტიციები ყურის ქვეყნებიდან,“ - განაცხადა ეკონომიკისა და მდგრადი განვითარების მინისტრმა ნათია თურნავამ, რომელიც კატარში ოფიციალური ვიზიტით იმყოფება. დელეგაციაში, რომელსაც მინისტრი ხელმძღვანელობს, ასევე შედიან ეკონომიკისა და მდგრადი განვითარების მინისტრის მოადგილე გენადი არველაძე და სააგენტოს „აწარმოე საქართველოში“ დირექტორი მიხეილ ხიდურელი.
ვიზიტის ფარგლებში, საქართველოს დელეგაცია უკვე შეხვდა კატარის კომერციისა და ინდუსტრიის მინისტრს ალი ბინ აჰმედ ალ კუვარის, ასევე კატარის ბიზნესმენთა ასოციაციის თავმჯდომარეს, შეიხ ფაისალ ბინ ქასიმ ალ თანისს და ადგილობრივი ბიზნესის წარმომადგენლებს.
„შეხვედრებზე გამოიხატა მაღალი ინტერესი საქართველოს მიმართ. კატარიდან ზოგიერთ უკვე დაწყებული აქვს პროექტი საქართველოში, მაგრამ ორმხრივი თანამშრომლობის პოტენციალი გაცილებით დიდია. ინვესტორებს აინტერესებთ საქართველოში შემოსვლა - ისინი ხედავენ პოტენციალს სამშენებლო სექტორში, სასტუმროების ინდუსტრიასა და სხვა სექტორებში. გარდა ამისა, მათ დიდი ინტერესი აქვთ, მონაწილეობა მიიღონ საქართველოს შავი ზღვის აკვატორიის საპორტო - სატერმინალო ინფრასტრუქტურის განვითარების პროცესში. საქართველო არის აბრეშუმის გზის ნაწილი და ყატარსაც სურვილი აქვს, ამ პროცესში მიიღოს აქტიური მონაწილეობა“, - განაცხადა ნათია თურნავამ.
მისი თქმით, შეხვედრებზე გამოითქვა ძალიან ბევრი საერთო ინტერესი. „მე ძალიან პოზიტიურად განვეწყვე და ვფიქრობ, რომ მნიშვნელოვანი ინვესტიციები წამოვა კატარიდან,“ - აღნიშნა ეკონომიკისა და მდგრადი განვითარების მინისტრმა.
საქართველოს დელეგაცია ვიზიტის ფარგლებში ასევე შეხვედრას გამართავს კატარის ენერგეტიკის საქმეთა სახელმწიფო მინისტრს და კორპორაცია „Qatar Petroleum“ - ის აღმასრულებელ დირექტორთან, საად შერიდა ალ კააბისთან, ტრანსპორტისა და კომუნიკაციების მინისტრთან იასიმ სეიფ აჰმედ ალ სულაითისთან, აგრეთვე „Qatar Mining“ - ის აღმასრულებელ დირექტორთან ჰალიდ ალ ობაიდლისთან და ადგილობრივი საქმიანი წრეების წარმომადგენლებთან.
