სავარაუდო ძალადობის მსხვერპლს და საკრებულოს მაჟორიტარს ექნებათ საშუალება, არგუმენტები წარადგინონ გამოძიების წინაშე, – განუცხადა ჟურნალისტებს საქართველოს იუსტიციის მინისტრმა, თეა წულუკიანმა სავარაუდო სექსუალურ ძალადობის ფაქტთან დაკავშირებით დასმული კითხვის პასუხად.
„თუ ინფორმაციის გამავრცელებელ ქალს აქამდე არ მიუმართვს პროკურატურისთვის, ეს ნიშნავს იმას, რომ მხოლოდ გუშინ, როდესაც მან საჯაროდ გამოაქვეყნა ცნობები სავარაუდო დანაშაულის ჩადენის შესახებ, გაუჩნდა საგამოძიებო ორგანოს ვალდებულება, რომ დაიწყოს გამოძიება და მჯერა, რომ ეს ასეც იქნება.
სავარაუდო დანაშაულის მსხვერპლს და მაჟორიტარს ექნებათ საშუალება, თავიანთი არგუმენტები წარადგინონ გამოძიების წინაშე. ვისურვებდი, რომ ეს ინფორმაციები არ დადასტურდეს, თუმცა იმდენად კონკრეტული და ფაქტებით და თარიღებით დასაბუთებული ინფორმაცია იყო, რომ გამომძიებელს მოუწევს ძალიან სერიოზული საგამოძიებო მოქმედებების ჩატარება“, – განაცხადა თეა წულუკიანმა.
თბილისის საკრებულოს დეპუტატს "ქართული ოცნებიდა" ილია ჯიშკარიანს მისი თანამშრომელი ქალი სექსუალურ ძალადობაში ადანაშაულებს.
აღნიშნულ საქმეზე შსს-მ გამოძიება სამი მუხლით დაიწყო - 126-მუხლი – ძალადობა, 138-ე მუხლი – სექსუალური ხასიათის სხვაგვარი ქმედება და 187-ე – ნივთის დაზიანება ან განადგურება.
