აბორტის შესახებ არჩევანი, ცხადია, ეკუთვნის ქალს. ვფიქრობ, ეს უფლება მას არ უნდა შეეზღუდოს, - განაცხადა უზენაესი სასამართლოს უვადო მოსამართლეობის კანდიდატმა, თამარ ალანიამ პარლამენტში საკომიტეტო მოსმენაზე უმრავლესობის დეპუტატის ვანო ზარდიაშვილის კითხვის პასუხად.
მისი თქმით, ვერც ერთი სხვა სუბიექტი აბორტის გაკეთების მოთხოვნით ვერ მიმართავს სასამართლოს.
„მე ვფიქრობ, ეს უფლება მას არ უნდა შეეზღუდოს, იმიტომ რომ არჩევანი, იყოლიოს შვილი, გაუძღვეს ამ ტვირთს, ეს არის უშუალოდ ქალის გადასაწყვეტი. ცხადია, როცა ხდება ოჯახის დაგეგმვა და ოჯახთან მიმართებაში საუბარი, მნიშვნელოვანია გავითვალისწინოთ გაეროს ქალთა უფლებების დაცვის კუთხით მათი ანგარიშები, რომლებიც მოიცავს ოჯახის დაგეგმვას, საზოგადოების ინფორმირებას და ქალის და ნაყოფის ჯანმრთელობაზე ზრუნვას“, - თქვა ალანიამ.
რაც შეეხება ქალის არჩევანს, როცა ქალი არის ფეხმძიმედ, ეს არის მისი გადასაწყვეტი. მაგრამ არის კიდევ საკითხი, რომელიც უკავშირდება სუროგაციასა და ემბრიონის უფლებას. ესეც ძალიან საინტერესო საკითხია, რომელზეც შეიძლება კიდევ ვიმსჯელოთ", - თქვა ალანიამ პარლამენტის იურიდიულ საკითხთა კომიტეტის სხდომაზე.
