საქართველოს 2019 წლის სახელმწიფო ბიუჯეტში შესატანი ცვლილებების თანახმად,  შემოსულობების საპროგნოზო მაჩვენებელი 12 956.5 მლნ ლარით განისაზღვრა (2019 წლის სახელმწიფო ბიუჯეტის შესახებ საქართველოს კანონით განსაზღვრულ მაჩვენებელს 92.8 მლნ ლარით აღემატება) მათ შორის:

შემოსავლები - 10 540.4 მლნ ლარი (დამტკიცებულ გეგმასთან შედარებით გაზრდილია 52.7 მლნ ლარით);

Ø საგადასახადო შემოსავლები - დამტკიცებულ გეგმასთან მიმართებაში არ იცვლება და კვლავაც განისაზღვრება 9 645.0 მლნ ლარით, თუმცა მნიშვნელოვნად დაკორექტირდა მისი კომპოზიცია:

• საშემოსავლო გადასახადის საპროგნოზო მაჩვენებელი განისაზღვრება 3 150.0 მლნ ლარით (მცირდება 16 მლნ ლარით). საშემოსავლო გადასახადის პროგნოზის შემცირება ძირითადად უკავშირდება დაგროვებითი საპენსიო სქემის ამოქმედებას და სისტემაში პროგნოზირებულზე მეტი ადამიანის დარჩენას;
• მოგების გადასახადის საპროგნოზო მაჩვენებელი განისაზღვრა 855.0 მლნ ლარით, რაც 74 მლნ ლარით აღემატება დამტკიცებულ მაჩვენებელს. გადასახადის ამ სახეში დამატებითი მიღებული შემოსავლები გამოწვეულია გადამხდელთა მიერ მოგების პროგნოზირებულზე მაღალი განაწილებით.
• დამატებული       ღირებულების         გადასახადის საპროგნოზო         მაჩვენებელი განისაზღვრა 4 071.0 მლნ ლარით, რაც 35 მლნ ლარით აღემატება 2019 წლის პირველად გეგმას. გადასახადის ამ სახეში მიღებული შემოსავლების დინამიკა ძირითადად გამოწვეული საგადასახადო ადმინისტრირების გაუმჯობესებით. ამასთან, ნაერთი ბიუჯეტში დღგ გადასახადი იზრდება 43 მლნ ლარითდა შესაბამისი 19% მიიმართება მუნიციპალიტეტების ბიუჯეტებში;
• აქციზის საპროგნოზო მაჩვენებელი განისაზღვრა 1 287.0 მლნ ლარის ოდენობით, რაც 175.0 მლნ ლარით ნაკლებია 2019 წლის დამტკიცებულ გეგმასთან შედარებით. გადასახადის ამ სახეში დანაკლისი გამოიწვია 2019 წლის მანძილზე თამბაქოს მოხმარების სტრუქტურის მნიშვნელოვანმა ცვლილებამ და შესაბამისად თუთუნის მოხმარების (რომლის დაბეგვრა პრაქტიკაში მინიმალური განაკვეთით ხდება) მნიშვნელოვანმა ზრდამ;
• იმპორტის გადასახადის საპროგნოზო მაჩვენებელი განისაზღვრა 75.0 მლნ ლარით, რაც 8 მლნ ლარით ნაკლებია თავდაპირველ გეგმასთან შედარებით. განახლებული გეგმა ასახავს იმპორტის არსებულ ტენდენციებს, რაზეც მათ შორის გავლენას ახდენს თავისუფალი სავაჭრო შეთანხმებები.
• სხვა გადასახადის საპროგნოზო მაჩვენებელი განისაზღვრება 207.0 მლნ ლარით, რაც 90 მლნ ლარით აღემატება თავდაპირველ გეგმას.

• სხვა შემოსავლების პროგნოზი იზრდება 45 მლნ ლარით და განისაზღვრება 505.0 მლნ ლარით, ზრდა გათვალისწინებულია პროცენტის და სანქციების/ჯარიმების მუხლით, ასევე საქართველოს ეროვნული ბანკის დაგეგმილზე მაღალი დივიდენდით;
• გრანტების სახით დაგეგმილი მაჩვენებლები განისაზღვრება 390.4 მლნ ლარით (იზრდება 7.7 მლნ ლარით საინვესტიციო პროექტების ნაწილში), ძირითადად ათასწლეულის გამოწვევა საქართველოს (MCC) პროგრამის ფარგლებში, რომელიც სრულდება მიმდინარე წელს.
• არაფინანსური აქტივების კლების (პრივატიზაცია) სახით მისაღები თანხების გეგმა, არსებული ფაქტიური მონაცემების გათვალისწინებით იზრდება 10,0 მლნ ლარით და შეადგენს 80.0 მლნ ლარს;
• ფინანსური აქტივების კლების (სესხების დაბრუნება) მაჩვენებელი არ იცვლება და კვლავ განისაზღვრება 120.0 მლნ ლარის ოდენობით;
• ვალდებულებების ზრდის სახით მისაღები სახსრების გეგმა გაზრდილია 30.0 მლნ ლარით და განისაზღვრება 2 216.1 მლნ ლარის ოდენობით, მათ შორის:
• საინვესტიციო პროექტების დასაფინანსებლად მიღებული გრძელვადიანი, შეღავათიანი კრედიტები მცირდება 369.9 მლნ ლარით და განისაზღვრება 931.1 მლნ ლარით. 2018 წლის ბოლოს დაწყებული მასშტაბური საინვესტიციო პროექტების შესრულება თავისი კომპლექსურობიდან გამომდინარე, ნაწილობრივ გადავიდა მომდევნო წელს, რაც იწვევს ამ პროექტებზე მიბმული ასიგნებების და ამ სახით მისაღები შემოსულობების შემცირებას 2019 წლის ბიუჯეტის პროექტში. ამავდროულად, საინვესტიციო პროექტების მაჩვენებელი კვლავ შენარჩუნებულია წარმოდგენილ პროექტში და ხდება იმ პროექტების აქსელერაცია, რომლებიც საბიუჯეტო სახსრებით ფინანსდება.
• საბიუჯეტო კრედიტები არ იცვლება  და კვლავ განისაზღვრება 385.0 მლნ ლარით.
• სახაზინო ვალდებულებებისა და სახაზინო ობლიგაციების ემისიით და მათი დაფარვის შედეგად საშინაო სახელმწიფო ვალდებულებების წმინდა ზრდა იზრდება 400.0 მლნ ლარით და შეადგენს 900.0 მლნ ლარს. 2019 წელს ჯამურად მოხდება 900 მლნ ლარის ფასიანი ქაღალდების გამოშვება (ნაცვლად თავდაპირველი გეგმით გათვალისწინებული 400.0 მლნ ლარისა) ფასიანი ქაღალდების გამოშვების ზრდა დაკავშირებულია, როგორც ბაზრის განვითარების ღონისძიებებით, კერძოდ გასულ წელს ე.წ. ბენჩმარკ ბონდების გამოშვებით, რომლის დაფარვაც 2020 წლის იანვარში უნდა განხორციელდეს და საჭიროა მიმდინარე წლის ბოლომდე რესურსების მობილიზება. ასევე, დამატებითი მუნიციპალური პროექტების დაფინანსების მიზნით საჭიროა დამატებითი რესურსების მობილიზება.