ჩრდილო ოსეთის სასამართლომ საქართველოს სასარგებლოდ ჯაშუშობაში ბრალდებულ ედუარდ გაბოზოვს 10 წლით თავისუფლების აღკვეთის განაჩენი გამოუტანა.
"ჩრდილოეთ ოსეთის უმაღლესმა სასამართლომ ე.წ. სამხრეთ ოსეთის ჯარისა და უსაფრთხოების სამსახურის უფროსს, რუსეთის მოქალაქეს საქართველოს სასარგებლოდ ჯაშუშობაში ბრალდებულ ედუარდ გაბოზოვს 10 წლით თავისუფლების აღკვეთა მიუსაჯა", _ იუწყება რუსეთის გენერალური პროკურატურა.
"სასამართლოში დადგინდა, რომ ედუარდ გაბოზოვი, არის რა რუსეთის მოქალაქე საქართველოს სპეცსამსახურების წარმომადგენელთა დავალებით სახელმწიფო საიდუმლოებების შეგროვებითა და გაცემით იყო დაკავებული", _ იუწყება რუსული მედია.
გამოძიების ინფორმაციით, გაბოზოვი საქართველოს სპეცსამსახურებთან, გასამრჯელოს სანაცვლოდ 2004 წლიდან - 2009 წლამდე პერიოდში თანამშრომლობდა და სამხრეთ ოსეთის ტერიტორიაზე ისეთი ინფორმაციის შეგროვებით იყო დაკავებული, რომელიც რუსეთის ფედერაციის საგარეო უსაფრთხოებას საფრთხეს უქმნიდა.
"მხედველობაში მიღებულ იქნა რა, რომ ბრალდებულმა მთლიანად აღიარა თავისი დანაშაული, მოინანია და აქტიურად ითანამშრომლა გამოძიებასთან, ასევე ის, რომ მას ჰყავს მეუღლე და სამი მცირეწლოვანი ბავშვი გაბოზოვს მკაცრი რეჟიმის კოლონიაში სასჯელის მოხდით 10 წლით თავისუფლების აღკვეთა მიესაჯა", _ იუწყება რუსული მედია.
გენპროკურატურა სასამართლოს მიერ გამოტანილი განაჩენის თარიღს არ აკონკრეტებს.
